Дина Төлепберген орнына келген жүргізушіні таныстырды (фото)
Көпшіліктің сүйіктісіне айналған бағдарлама тізгіншісі Дина Төлепбергеннің орнына өзге жүргізуші келді. Бұл туралы Дина ханым Instagram парақшасында жазды.
- Астарлы ақиқатта жаңа жүргізуші. Бұл – Руслан Өтепбай. Руслан менің командама осыдан үш жыл бұрын келіп еді. Ол кезде Астарлы ақиқатты ток-шоу форматына трансформациялап жаттық. Жігерлі команда жинау мақсатында кастинг жариялаған болатынмын. Сөйтіп, сан үміткердің арасынан редактор болуға қабілеті бар деген 20-25 тей адамды іріктеп алдым. 2 апталық сынаққа шақырдым. Өтсе, жұмыста қалады.
Ақиқатын айтсам, мен үшін де өмірімдегі ең қызық кезеңдердің бірі осы болған сірә. Оқыту, үйрету, бақылау, адамдарды тану барысы. Қайнаған жұмыс. Бір-бірінен басып озар жобалар. Кезек таңдауға келгенде ұзақ ойланғаным рас. Көпшілік менің шешіміме сол кезде таң қалған еді. Өйткені телевизиямен байланысы болмаған кей жандар жұмысқа қабылданды.
Шынын айтсам, кандидаттан қателеспеу үшін мен ең алдымен ӨЗІМЕ үш сұрақ қойдым:
1. Мен осы адаммен алдағы уақытта тамсанамын ба? Өзім үйретіп қана қоймай, үйренерім бар адамдармен жұмыс істеуді армандадым.
2. Осы адам менің командамның өсуіне ықпал ете ме? Меніңше, біз энтропиямен күресіп, ұдайы өсуіміз керек.
3. Бұл адам – супержұлдыз ба? Джефф Безос айтпақшы, тек лидерлер ғана басқаша ойлайды.
Стандарттарға сай емес, бірақ менің үш сұрағыма жауап берген жанның бірі - Руслан еді. Осы уақытқа дейін ол кадр сыртында аянбай еңбектенді. Енді, кадрға кіретін салтанатты сәт! Қадамың құтты болсын, Рус! Дүйсенбідегі дебютті бірге көрейік!, - деп жазды Дина Төлепберген.
Жаңа жүргізуші Дина ханымға жауап жазып, алғысын айтты.
- Үш жыл “Астарлы Ақиқат” студиясының сыртында бағдарлама жасақтап жүрдім, енді сырттан ішке кіруге мүмкіндік туды. Талай бағдарлама арқылы кадрдан тыс толағай іс тындырдық. Жалпақ жұрттың жан жарасын естіп, біліп һәм көрсетіп жүрміз. Десекте алып “Астарлы Ақиқатты” азғантай уақыт болсын тіс қаққан тілшімен тізгіндеу оңай дүние болмады. Алайда, мендегі кем-кетікті байсалдылығымен білдіртпей, жаңылысқан жерімді жамап, демеу болған Дина әпке, сізге рақмет! Сізбен бір арнада іргелес, бір бағдарламада тіркелес боп жүргеніме бақыттымын. Ертеден салсаң кешке озып, ылдидан салсаң төске озып жүргеніміз болса- ол сіздің салған сара жол. Журналистік әділдігіңіз бен тілшілік тиянақтылығыңыз жанға жұғыс болсын. Қарақат көз, шарапат- сөзіңіз ынта-жігерімізді арттыра берсін. Маған берген сәт пен мүмкіндіңіз үшін рақмет, Дина әпке!, - деп жазды Руслан Утепбай.
Сәйкес тақырыптар
