15 маусымда кешке денсаулық сақтау министрі Елжан Біртановтың денсаулық жағдайы қалыпты деп бағаланды. Бұл туралы ведомствоның ресми өкілі Диас Ахметшәріп хабарлады, деп жазады Oinet.kz тілшісі

"Оған пневмония диагнозы қойылды. Қазіргі уақытта министр хаттамаға сәйкес ем қабылдап жатыр. Бірақ емделіп жатқанына қарамастан, ол ауруханада, коронавирусты анықтау жөніндегі штабтың жұмысын онлайн режимінде үйлестіруде. Біз Елжан Амантайұлының тезірек оралуын күтеміз", - деді Диас Ахметшәріп.

Белгілі болғандай, Елжан Біртанов Нұр-Сұлтандағы стационарда емделіп жатыр. 

Еске сала кетейік, жақында Елжан Біртановтың "қатаң санитарлық шараларға қарамастан" коронавирус жұқтырғаны белгілі болды. Бұл туралы министрдің өзі Facebook-те жазды.