Тимур Асқарұлы Құлыбаев 1966 жылы 10 қыркүйекте Алматы қаласында дүниеге келген.  Қазақстан Республикасының тұңғыш Президенті Нұрсұлтан Әбішұлы Назарбаевтың күйеубаласы. Елбасының ортаншы қызы Динара Құлыбаеваның жолдасы. 

Қазақстандағы ең ірі бизнесмен. Bloomberg басылымында жарияланған мәлімет бойынша зайыбы Динара ҚҰлыбаева екеуінің байлығы 5 миллиард долларды құрайтындығы айтылған.

Тимур ҚҰлыбаев қазақстандық кәсіпкер, қоғам қайраткері, KazEnergy ассоциациясының төрағасы, Қазақстан ұлттық экономикалық «Атамекен Одағы» палатасы президиумының төрағасы, Қазақстан Республикасы Бокс федерациясының төрағасы, «Газпром» РАҚ-ы директорлар кеңесінің мүшесі.

Білімі

1983 жылы республикалық физика-математика мектебін  бітірген.

1988 жылы М. В. Ломоносов атындағы Мәскеу мемлекеттік университетінде «Халық шаруашылығын жоспарлау» мамандығы бойынша білім алған.

1999 жылы экономика ғылымдарының кандидаты ғылыми дәрежесін алу үшін «Нарық жағдайында кәсіпорынды басқарудың ұйымдық-экономикалық механизмін жетілдіру (мұнай өндіру өнеркәсібі мысалында)» тақырыбы бойынша диссертация қорғады.

Еңбек жолы

1988-1990 жылдары Қазақ КСР Мемлекетіне қарайтын Ғылыми-зерттеу экономикалық институтында кіші ғылыми қызметкер болып жұмыс істеді.

1990-1992 жылдары Қазақстанның мәдени, әлеуметтік және ғылыми-техникалық «Даму» қорының ғылыми-кеңес беру орталығының директоры болды.

1992-1995 жылдары «Алтын-Алма» концернін басқарды (кейін «Алмэкс» холдингі болып қайта құрылды). Бұл консерн қаржы-инвестициялық қызметпен айналысады.

1995 жылдың көктемінде Құлыбаев Нидерландтық MeesPierson банкімен серіктестермен бірге Алматы сауда-қаржы банкін (АТФ-Банк) тіркеді. Ол бұл банкте бақылау кеңесінің төрағасы, сондай-ақ несие комитетінің мүшесі болды.

1997 жылы қаңтарда Қазақстан Республикасы Инвестициялар жөніндегі мемлекеттік комитетінің Жобаларды бағалау және келіссөздер жүргізу дирекциясының басшысы болып тағайындалды. Осы жылы көктемде осы қызметтен кетті.

1997 жылдың наурыз айында Қазақстан Президентінің Жарлығымен «Казахойл» ұлттық мұнай-газ компаниясы» ЖАҚ құрылды. Оған Қазақстанның мұнай-газ өнеркәсібінің барлық мемлекеттік кәсіпорындары кірді. 1997 жылдың мамырынан 1999 жылдың наурызына дейін Тимур Құлыбаев «Kazakhoil»-да экономика және қаржы жөніндегі вице-президенті қызметін атқарды.

1999 жылдың наурыз айында «ҚазТрансОйл» мұнай тасымалдау жөніндегі ұлттық компаниясы» ЖАҚ президенті болып тағайындалды.

2001 жылдың мамырынан 2002 жылдың ақпанына дейін — «ҚазТрансОйл» және «ҚазТрансГаз» компанияларының базасында құрылған ЖАҚ-ның бас директоры болды.

2002 жылғы ақпаннан 2005 жылғы қазанға дейін — «Kazakhoil» және «Мұнай және газ транспорты» ұлттық компанияларының қосылуы арқылы құрылған «ҚазМұнайГаз» Ұлттық компаниясы «АҚ бірінші вице-президенті болып тағайындалды.

2005 жылы Қазақстанның энергетикалық секторында жұмыс істейтін негізгі ұлттық және шетелдік компанияларды біріктірген және жеке инвесторлар мен мемлекеттік құрылымдар арасындағы қарым-қатынасты орнату бойынша тиімді лоббистік құрылым болып табылатын «Kazenergy» мұнай-газ және энергетикалық кешені ұйымдарының қазақстандық қауымдастығы» ЗТБ-ны құруға бастамашылық жасады және басқарды.

2005 жылдан 2013 жылға дейін Қазақстан Республикасы Президентінің штаттан тыс кеңесшісі болды.

«Самұрық-Қазына» қоры

2008 жылдың қазан айында «Самұрық-Қазына «ұлттық әл-ауқат қоры»АҚ Басқарма төрағасының орынбасары болып тағайындалды. Қордың еншілес компанияларының директорлар кеңесінің төрағасы болды. Олар: «Қазатомөнеркәсіп» (2008-2012), «Қазақстан темір жолы» (2009-2011), «Самұрық-Энерго» (2009-2011).

«Атамекен» Одағы

2010 жылдың сәуір айында «Атамекен» Одағы Қазақстан ұлттық экономикалық палатасы президиумының төрағасы болып сайланды.

2011 жылдан бастап «Газпром» ААҚ директорлар кеңесінің құрамына тәуелсіз директор ретінде кірді (қазір — «Газпром» АҚ).

2013 жылы «Қазақстан Республикасының Ұлттық Кәсіпкерлер палатасы туралы» заң қабылданды. Ұлттық палата 2013 жылғы 9 қыркүйекте Қазақстан Үкіметі мен «Атамекен» Одағы ҚҰЭП бірлескен шешімімен бизнес пен биліктің тиімді әріптестігі негізінде кәсіпкерлікті дамыту үшін қолайлы жағдайлар жасау мақсатында қайта құрылды. ҰКП Төралқа Төрағасы болып сайланды.

2009 жылдан бастап Қазақстан бокс федерациясының президенті болып тағайындалды. Оның жетекшілігімен қазақстандық боксшылар командасы 2012 жылғы Олимпиада ойындарында бір алтын, бір күміс және екі қола медаль және 2016 жылғы Олимпиада ойындарында бір алтын, екі күміс және екі қола медаль жеңіп алды.

2012 жылдың наурыз айынан бастап — вице-президент, Халықаралық әуесқой бокс қауымдастығының Атқарушы комитетінің мүшесі (AIBA).

2012 жылдың қараша айында Құрылтай жиналысында спорттық жекпе-жек және күш қолданылатын спорт түрлері конфедерациясының төрағасы болып сайланды.

2015 жылғы қыркүйектен бастап Қазақстан Республикасы Ұлттық Олимпиада комитетінің президенті болды.

2016 жылдың қазан айынан бастап Қазақстан су спорт түрлері федерациясының президенті болып тағайындалды.

Марапаттары:

«Құрмет» Ордені (2001)

I дәрежелі «Барыс » ордені (2014)

III дәрежелі «Барыс» ордені (2009 жыл)

«Қазақстан Республикасының Конституциясына 10 жыл» мерейтойлық медалі (2005))

«Астананың 10 жылдығы» мерейтойлық медалі (2008)

«Құрметті теміржолшы» белгісі (2011)

Халықаралық наградалары:

Достық Ордені (Ресей, 2007)

«Әл-Фахр» Ресей мүфтилер кеңесінің ордені (2010)

Орыс православиелік шіркеуінің ордені (РПЦ, 2010)

Отбасы

Әкесі — Асқар Алтынбекұлы Құлыбаев (1937 ж.) — техника ғылымдарының докторы, Мемлекеттік және қоғам қайраткері, XI-ші шақырылған КСРО Жоғарғы Кеңесінің депутаты, КСРО Халық депутаты (1989-1991), Қазақ КСР Жоғарғы Кеңесінің X—XI шақырылымының депутаты.

Ағасы — Талғат Асқарұлы Құлыбаев (1960 ж.) — полиция генерал-майоры, заң ғылымдарының докторы, Қазақстан ІІМ Алматы академиясының бастығы.

Жұбайы — Динара Нұрсұлтанқызы Құлыбаева (1967 ж.) — Қазақстан Президенті Нұрсұлтан Назарбаевтың екінші қызы. Педагогика ғылымдарының докторы (2007), Қазақстан Ұлттық Ғылым академиясының корреспондент-мүшесі. 1999 жылдан бері Динара Құлыбаеваның жетекшілігімен елімізде Астана мен Алматыда «Мирас» халықаралық мектептері,  «Арыстан» мамандандырылған лицейі құрылды. Ол әзірлеген теория мен методология осы білім беру ұйымдарының құрылу және жұмыс істеу негізіне алынды. Ол «Парасат» орденімен (2009), «Ыбырай Алтынсарин» төс белгісімен (2006), Дашкова РАЕН (2007), «ҚР Білім беру ісінің құрметті қызметкері» төсбелгісімен (2008) марапатталған.

Үш баласы бар: ұлы Алтай (1990 ж.), қызы Дениз (2004 ж.) және Алишия (2010 ж.)

Ұлы Алтай Құлыбаев 2012 жылы Лондон қалалық университетінде Cass Business School бакалавр дәрежесін алды.

Активтері:

Тимур Құлыбаев «ALMEX Plus» ЖШС, «Кипрос» ЖШС, «Меркурий» ЖШС, «Аксайгазсервис» АҚ, «Viled Group» ЖШС, «Viled Fashion» ЖШС (Saks Fifth Avenue дүкені) және басқалары бар. Ол «Атамекен» ұлттық кәсіпкерлер палатасын басқарады және Қазақстан Республикасының Ұлттық олимпиада және  Азия Олимпиадалық кеңесінің вице-президенті, сондай-ақ, «Газпром» ААҚ Директорлар кеңесінің мүшесі.

Forbes сайтының мәліметіне сәйкес, 2018 жылғы қорытынды бойынша Тимур Құлыбаевтың жылдық табысы —  $3.1 млрд. Бұл 2017 жылға қарағанда бір жыл ішінде + $0,9 млрд өзгеріс болған.