Шығыс Қазақстан облысының әкімі Даниал Ахметов Қытаймен шекаралас ауыл тұрғындарын коронавирустан үрейленбеуге шақырды, деп хабарлайды Kazinform.kz порталына сілтеме берген Oinet.kz.

Бүгін аймақ басшысы Даниал Ахметовтың халық алдында есеп беру кездесуінде Зайсан ауданының тұрғыны Бақыт Сырбаева шекарадағы елді мекен жұртшылығы Қытайда тараған жұқпалы вирустан қорқып отырғанын жеткізді. Әкім қазіргі уақытта жағдайдың қатаң бақылауда екенін айтып, халықты сабырға шақырды. 

- Өңірімізде коронавирустың таралуына жол бермеу үшін жедел штаб құрылған. 17 ақпаннан бастап Қытайдан келген әрбір азамат 2 аптаға обсервациялық бақылауға жатқызылады. Облыстың медициналық мекемелерінде коронавирусқа қарсы препараттар қоры жеткілікті. Сондықтан баршаңызды үрейленбеуге шақырамын. Жағдай бақылауда, - деді Даниал Кенжетайұлы.