Мәжіліс депутаты Владимир Божко өзіне тағылған айыптарды жоққа шығарып, отставкаға кетпейтінін мәлімдеді, деп хабарлайды OINET.KZ сайтының тілшісі sputniknews.kz сайтына сілтеме жасап.

Қазақстан халқы Ассамблеясының өкілдері жиналып, мәжіліс депутаты Владимир Божконы әлеуметтік араздық тудырды деп айыптады. Бұдан бөлек, рейдерлікпен айналысып, басқаларға қорлық көрсетті деген айып та тағылды. Қоғам белсенділері Божконың депутаттық өкілеттігін тоқтатуын талап етіп, президентке хат жазатынын мәлімдеген болатын.

Мәжіліс төрағасының орынбасары Владимир Божко журналистердің "отставкаға кетесіз бе?" деген сауалына жауап берді.

"Әрине, жоқ", - деп қысқа қайырды Божко.

Айтуынша, кеше Алматыда баспасөз мәслихатын өткізген бір топ адамның көздеген басқа мақсаты бар. Бірақ, олар оны жасырып отыр.

"Бір апта бұрын Захаров (казак атаманы) пен оның ұйымына қатысты рейдерлік жолмен тартып алған ғимаратты босату туралы сот шешімі шықты. Бұл шешімге менің еш қатысым жоқ. Талап-арызды Жетісу казактары одағы түсірген. Захаров пен осы одақ арасындағы іс жеті жылға созылды. Көптеген сот отырысы болды. Ақыры әділдік орнататын шешім қабылданды", - деді ол.  

Божконың ойынша Захаров бұл жолы жауапкершіліктен қашып құтыла алмағандықтан, оның бұған дейінгі мәлімдемелерін желеу етіп, айып таққан.

"Мен "Қазақстандағы орыс, славян және казак ұйымдарының қауымдастығы"  заңды тұлғалар бірлестігін басқарамын. Ал Жетісу казактары одағы, Орал казактары одағы, Солтүстік Қазақстан, Шығыс Қазақстан облыстарындағы казактар одағы біздің одаққа кіреді. Сондықтан олар баспасөз мәслихатында мені әбден қаралады. Бірақ таққан айыптарының барлығы өтірік", - деді Божко.

Депутат орыс, славян және казак ұйымдарына ешқашан қысым көрсетпегенін айтты.

"Әрине, қысым болған жоқ. Біз Қазақстан халқы Ассамблеясының мүшесіміз. Неге олар мұны ассамблеяның өз ішінде емес, осындай деңгейге шығарғанына таңғалдым", - деді спикердің орынбасары.