Шымкент қаласының әкімі Ғабит Сыздықбеков өндіріс және инфрақұрылым бағытындағы бірнеше нысанды аралап, ондағы жұмыс барысын тексерді. Сапардың басты мақсаты — өндірістік әлеуеті жоғары кәсіпорындардың даму қарқынын бағалау, жаңа жобалардың жүзеге асырылу деңгейін бақылау және қала экономикасын нығайту жолдарын нақтылау болды.

Әкімнің алғашқы аялдамасы – «MK.Kazyna» жауапкершілігі шектеулі серіктестігі. Бұл кәсіпорын бүгінде қаладағы белсенді өндіріс ошақтарының бірі саналады. Мұнда жыл сайын 250 мыңнан астам өнім өндіріледі. Компания басшылығы алдағы уақытта өндірісті толық автоматтандыру және жаңа өндірістік желіні іске қосу арқылы өнім көлемін ұлғайтуды көздеп отыр.

Ғабит Сыздықбеков кәсіпорынның дамуына қатысты жоспарлармен танысып, кәсіпкерлердің ұсыныстарын тыңдады. Кәсіпорынның қызмет аясын кеңейту мақсатында әкімдік тарапынан қолдау көрсетілетіні айтылды. Атап айтқанда, арнайы экономикалық аймақ немесе шағын өнеркәсіп аймағынан қосымша жер телімін бөлу мүмкіндігі қарастырылуда. Бұл өз кезегінде жаңа жұмыс орындарының ашылуына және жергілікті экономиканың тұрақтылығын арттыруға ықпал етеді.

Сапар барысында қала әкімі «Оңтүстік» арнайы экономикалық аймағы мен «Жұлдыз» индустриялық аймағын байланыстыратын теміржол желісінің құрылыс барысымен де танысты. Бұл жоба – қаланың өндірістік инфрақұрылымын жетілдіруге бағытталған стратегиялық бастамалардың бірі.

Жаңа теміржол желісінің іске қосылуы логистикалық жүйенің тиімділігін арттырып, аймақтағы кәсіпорындарға үлкен мүмкіндік бермек. Енді өндіріс орындары шикізатты тез жеткізіп, дайын өнімді нарыққа уақытылы шығара алады. Сонымен қатар, бұл жоба шетелдік және отандық инвесторлар үшін өңірдің тартымдылығын арттыруға жол ашады.

Әкімнің айтуынша, Шымкент соңғы жылдары индустриялық-инновациялық даму бағытында үлкен жетістіктерге жетіп отыр. Қаланың арнайы экономикалық аймақтары мен индустриялық аймақтарында ондаған кәсіпорын жұмыс істейді. Олар құрылыс материалдары, металл өңдеу, машина жасау, жеңіл өнеркәсіп және химия салаларында өнім шығарып, ішкі нарықты қамтамасыз етумен қатар экспорт әлеуетін де арттырып келеді.

Сапар соңында Ғабит Сыздықбеков тиісті басқармаларға нақты тапсырмалар берді. Әсіресе теміржол желісінің құрылысын белгіленген мерзімде сапалы аяқтауды және өндірістік нысандарға қажетті инфрақұрылым жеткізуді жүктеді.