Шымкент қаласындағы ең ірі өндіріс орындарының бірі – «ПетроҚазақстан Ойл Продактс» жауапкершілігі шектеулі серіктестігі биыл өзінің 40 жылдық мерейтойын атап өтті. 

Қаланың экономикалық дамуы мен мұнай өңдеу саласындағы ірі жетістіктер осы кәсіпорынмен тығыз байланысты екені даусыз.

Мерейтой салтанаты зауыт аумағында ерекше форматта ұйымдастырылды. Шара барысында кәсіпорынның орталық аллеясында естелік тақта ашылып, зауыттың символына айналған ЛК-6У қондырғысы жанында жиналған қауым өткен жылдарды еске алды. Төрт онжылдық бойы өндіріс саласында тер төккен ардагерлер мен қазіргі буын өкілдері кездесіп, ұжымдық еңбектің қадір-қасиетін дәріптеді.

Салтанатты жиында Шымкент қаласының әкімі Ғабит Сыздықбеков сөз сөйлеп, зауыт ұжымын айтулы мерекемен құттықтады. Ол өз сөзінде кәсіпорынның тұрақты дамуы қала экономикасына үлкен серпін беріп отырғанын, жаңа технологиялар мен заманауи өндіріс тәсілдерінің енгізілуі өңірдің өнеркәсіптік әлеуетін күшейткенін атап өтті.

Қырық жыл ішінде Шымкент мұнай өңдеу зауыты 180 миллион тоннадан астам шикі мұнайды қайта өңдеп, ел нарығына сапалы жанармай өнімдерін ұсынды. Қазіргі уақытта кәсіпорынның өңдеу тереңдігі 88 пайызға дейін артса, жеңіл мұнай өнімдерінің үлесі 82 пайызды құрайды. Бұл көрсеткіштер зауыттың инновациялық бағыттағы табысты жұмысын дәлелдейді.

Мерейтой аясында кәсіпорынның 150-ден астам қызметкері мен ардагері мемлекеттік және салалық марапаттарға ие болды. Олардың арасында ондаған жыл еңбек етіп, зауыттың өркендеуіне зор үлес қосқан тәжірибелі мамандар бар. Әрбір марапат – маңдай тер мен табандылықтың жемісі.

Сондай-ақ осы мерекелік күнге орай көлемі 320 беттен тұратын «Еңбек. Жетістік. Болашақ» атты кітап пен арнайы деректі фильмнің тұсаукесері өтті. Бұл еңбектерде кәсіпорынның құрылу тарихы, өндірістік даму кезеңдері, зауытты өрге сүйреген инженерлер мен жұмысшылардың өмір жолы кеңінен қамтылған. Деректі фильм көрерменге зауыттың қалыптасу жолын, еңбек адамдарының табандылығы мен жауапкершілігін әсерлі кадрлар арқылы көрсетеді.

Бүгінде Шымкент мұнай өңдеу зауыты тек өндіріс ордасы емес, әлеуметтік жауапкершілігі жоғары ұйым ретінде де қоғам назарында. Кәсіпорын қала өміріне белсенді араласып, әлеуметтік жобаларды жүзеге асыруда. Спорт алаңшалары мен демалыс аймақтарын салу, экологиялық бастамаларды қолдау және жастарды дамытуға бағытталған бағдарламалар соның айғағы. Мұның барлығы тұрғындардың өмір сапасын арттыруға бағытталған нақты істер.

Зауыттың еңбеккерлері өз кәсібін мақтан тұтады. «Бұл – жай ғана жұмыс орны емес, біздің өміріміздің бір бөлігі. Мұнда талай буынның маңдай тері мен еңбегі жатыр», – дейді зауыт қызметкерлерінің бірі.

Қазіргі таңда кәсіпорын экологиялық қауіпсіздік пен энергия тиімділігін арттыру бағытында да ауқымды жұмыстар атқарып келеді. Болашақта өндіріс процесіне жасыл технологияларды енгізу және жаңартылған қуат көздерін пайдалану жоспарланған.

Төрт онжылдық – бұл аз уақыт емес. Осы кезеңде зауыт небір қиындықты еңсеріп, еліміздегі мұнай өңдеу саласының көшбасшыларының біріне айналды. Бүгінгі мерейтой – өткен жолды бағалау ғана емес, жаңа мақсаттарға бағытталған сенімді қадам.