Сарыағаш ауданында «Ауыл – ел бесігі» және басқа жобалар шеңберінде бірнеше нысан салынуда

Oinet.kz 20-12-2024 51

Сарыағаш ауданында құрылыс саласында атқарылып жатқан жұмыс көп. Президент тапсырған жаңа экономикалық бағдарымыздың басты басымдықтарының бірі халықтың жайлылығын қамтамасыз ету. 

Screenshot_1.jpg

Соның қатарында халықты таза ауыз сумен, көгілдір отынмен, жайлы инфрақұрылыммен, жарықпен, спорттық және мәдени нысандармен, білім және денсаулық сақтау ғимараттарымен қамту да бар. Бұл бағыттағы жұмыстар Сарыағаш ауданында жоспарлы түрде кезең-кезеңмен жүзеге асырылуда. 

Сарыағаш ауданының әкімі Арман Абдуллаевтың айтуынша, ауданда «Ауыл – ел бесігі» жобасы аясында атқарылған жұмыс көп. Соның бірі – бүгінгі күні ауданға қарасты Жылға ауылдық округінде жалғасын табуда. Дәлірек айтсақ, округ орталығы Жылға елді мекенінде «Ауыл – ел бесігі» жобасы аясында жаңа спорт кешені бой көтеруде. Оның құрылыс жұмыстарына жауапты мекеме «Таймас Company» жауапкершілігі шектеулі серіктестігі. Бүгінгі күні ғимарат тұрғызылып, ішкі әрлеу, кәріз, жылу жүйелері жүргізіліп, спортпен шұғылдануға арналған құрал-жабдықтар орнатылуда. 

- Мемлекет басшысы Қасым-Жомарт Кемелұлы Жолдауында бұқаралық спортты дамытудың маңыздығы жоғары екенін атап өтті. «Баршаңызға мәлім, мен бұқаралық спортты дамытуға ерекше мән беріп отырмын. Жастарымыз дені сау, мықты азамат болып өсуі керек. Сондықтан ұлт саулығын сақтау үшін бұқаралық спорттың маңызы айрықша. Жақында мен Олимпиадаға қатысушылармен кездестім, спорттағы нақты міндеттер мен басымдықтарға тоқталдым. Шын мәнінде, бұл саладағы заңнаманы жаңартатын кез келді деп ойлаймын. Заңға енгізілетін өзгертулер бұқаралық спорт пен балалар спортын дамытуға зор серпін береді. Сондай-ақ болашақ жеңімпаздар шоғырын даярлауға жол ашады. Депутаттар осы маңызды заң жобасына айрықша мән бергені жөн деп санаймын» дей отырып Президент осы салаға жергілікті билік өкілдерінің де назарын аударған еді. қазір ауданымызда бір емес, екі спорт кешенінің құрылысы жүргізілуде. Жылға елді мекеніндегі спорт кешенін ашатын күн алыс емес. Бұдан бөлек, Құрама елді мекеніндегі спорт кешенінің құрылыс жұмыстары аяқталып қалады. Алда осы екі нысанды ел игілігіне беру жоспарлануда, - дейді аудан басшысы. 

Сонымен екінші спорт кешені Жартытөбе ауылдық округіне қарасты Құрама елді мекенінде салынуда. «Ауыл – ел бесігі» жобасы аясында салынып жатқан спорт кешенінің құрылыс жұмыстарына Құрама елді мекеніндегі мердігер мекеме «КДСМ» жауапкершілігі шектеулі серіктестігі жауапты. Құрылыс нысанының  іргетасын құю жұмыстары толығымен аяқталып темір колонналар орнатылған. Қабырғаларына кірпіш қалау жұмыстары жүргізілген. Бүгінгі таңда, ғимаратты қажетті құрал-жабдықтармен жабдықтау және ауласына абаттандыру жұмыстары жүргізілу үстінде. 

Қос спорт кешенінің құрылыс жұмысымен арнайы танысқан аудан басшысы спорт нысанының ауыл үшін маңызы зор екенін атап, оның сапалы салынуы басты шарт екенін мердігер компания өкілдеріне ескертті. Сонымен қатар, спорт кешеніне орналастырылатын жаңа жабдықтардың барлығы жоғары сапалы болуы, сондай-ақ қауіпсіздік шаралары ескерілуі қажет екенін атап өтті. Құрылыс жұмыстарының уақытылы жүргізілуі қатаң бақылауда болатындығын ескертіп, ауыл әкімі мен жауапты бөлім басшысына жұмыс барысын үнемі назарда ұстауды тапсырды. 

Сондай-ақ ауданға қарасты Қабланбек ауылдық округінің Қанағат елді мекеніне де «Ауыл – ел бесігі» жобасы шеңберінде 150 орындық мәдениет үйі мен кітапхана бой көтеруде. Қанағат елді мекеніндегі мәдениет үйі және кітапхананың құрылыс жұмыстарына жауапты мердігер мекеме Construction Group «SAMRUK» жауапкершілігі шектеулі серіктестігі. Қазіргі таңда, ғимараттың ауласына  тас төсеуіш орнату, қоршау және абаттандыру жұмыстары жүргізілуде. Жалпы құрылыс алдаңында 15  құрылысшы жұмыс атқаруда.

-Ауданда «Ауыл – ел бесігі» жобасынан өзге де жобалар жүзеге асырылуда. Атап айтсақ, «Ауылдық денсаулық сақтауды жаңғырту» ұлттық жобасы мен «Жайлы мектеп» жобасы аясында салынып жатқан нысандар бар. Мемлекет басшысы Қасым-Жомарт Тоқаев халыққа арнаған Жолдауларында медицина саласының дамуына ерекше көңіл бөліп келеді. Шынын айту керек, соңғы жылдары медицина саласында жеткен жетістік те, табыс та мол. Барлық дерлік облыстағы медициналық пункттер мен дәрігерлік амбулаториялар жаңартылды. Ауруханалар мен емханалар қатары да көбейе түскен. Ал заманауи құрал-жабдықтармен жабдықталмаған бірде-бір медициналық нысан жоқтың қасы. Соның бірі – Жылға елді мекенінде салынуда. 25 келушіге арналған дәрігерлік амбулаторияның құрылыс жұмыстары бүгінде аяқталды. Қазіргі таңда, ғимарат ішіне медициналық аппараттарды орналастыру, қажетті құралдармен жабдықтау, сыртқы қоршау жұмыстары жүргізілуде. Бұдан бөлек ауданда биыл 3 елді мекенінде фельдшерлік-акушерлік пунктерінің құрылыс жұмыстары басталып, олардың да құрылыс жұмыстары аяталып келеді, - дейді аудан әкімі Арман Абдуллаев. 

Ал «Жайлы мектеп» жобасы шеңберінде Дербісек ауылдық округінің орталығы Дербісек елді мекенінде 900 орындық мектеп құрылысы жүргізілуде. «Жайлы мектеп» құрылысын жүргізу үшін «Самұрық-Қазына» акционерлік қоғамы тарапынан қаржы бөлінген. Мектеп ғимаратының едендеріне линолеум төсеу, ішкі әрлеу, сантехникалық және электр желілерін тарту жұмыстары жүргізілуде. Сонымен қатар, білім беру ордасының ауласында балалар ойын алаңшасының құрылысы және абаттандыру жұмыстары қатар атқарылуда. Мектеп ғимаратын биылғы  жылдың соңында тапсыру жоспарлануда.

Сайрам ауданы әкімдігінде сыбайлас жемқорлықтың алдын алу жайы қаралды
Түркістан жерінің бар байлығы ел игілігі еселенуіне жарауда
Сәйкес тақырыптар
Көтерілу