Түркістан облысынан бір топ тұрғын Павлодар облысына жолға шықты. Бұл туралы Түркістан облысы әкімінің баспасөз қызметі хабарлады. 

 Сапардың мақсаты – «Еңбек» бағдарласы арқылы көшу үшін Павлодар өңіріндегі ауылдарды алдын ала көріп, ол жақтағы тіршілікпен танысу. Бұл игі бастаманы «Nur Otan» партиясының Түркістан облысындағы филиалдары және жергілікті жұмыспен қамту орталықтары ұйымдастырып отыр. Жеке кәсіпкер, қоғам белсендісі Жаңабай Ағабеков өз қаражаты есебінен автобус шығарып, тұрғындардың барып-қайтуына демеушілік жасады.

Алдымен көшуге ниетті тұрғындар Сарыағаш ауданында жиналды. Сарыағаш ауданы әкімінің орынбасары Бақытжан Полатов пен «Nur Otan» партиясы Сарыағаш аудандық филиалы төрағасының бірінші орынбасары Құдірет Қыстаубаев жолаушыларға сәт-сапар тіледі.

Осындай салтанатты іс-шара Сайрам ауданында да ұйымдастырылды. Сайрам аудандық мәслихатының хатшысы Шамхат Халмұрадов пен «Nur Otan» партиясы Сайрам аудандық филиалы төрағасының бірінші орынбасары Алмас Әбдіқадіров «Еңбек» бағдарламасының маңыздылығына тоқталып, мағлұмат берді. Кәсіпкер Жаңабай Ағабеков солтүстік өңірлерге көшкен тұрғындарға мемлекеттік қолдау көрсетілетінін, ең бастысы, жұмыс істеуге ниетті азаматтар жұмыспен қамтылатынын, баспаналы болуға да мүмкіндік мол екенін жеткізді.

Жалпы бүгін Түркістан облысынан 30 тұрғын жолға шықты. Нақтырақ айтсақ, Жетісай ауданынан – 2, Келес ауданынан – 3, Сайрам ауданынан – 8, Арыс қаласынан – 2, Ордабасы ауданынан – 6, Сарыағаш ауданынан – 6, Мақтаарал ауданынан – 1 және Қазығұрт ауданынан 2 азамат Павлодарға аттанды. Олардың жол ақысы және жатын орны тегін. Азаматтар ауылдарды аралап, жағдаймыен танысады. Егер ұнаса, көшеді.

2021 жылдың басынан бері «Еңбек» бағдарламасы бойынша Түркістан облысынан 412 отбасы, 1792 адам қоныс аударған. «Nur Otan» партиясының Түркістан облыстық филиалы төрағасының бірінші орынбасары Бейсен Тәжібаевтың айтуынша, көші-қон бойынша түсіндіру жұмыстары жалғасады. Барлық аудан, қалада «Еңбек» бағдарламасын насихаттау, түсіндіру бойынша «Ашық есік күндері» ұйымдастырылған.

Жуырда халыққа арнаған Жолдауында Президент Қасым-Жомарт Тоқаев халықты оңтүстіктен солтүстікке қоныстандыру үшін берілетін мемлекеттік қолдаудлың тәсілдерін қайта қарап шығуды тапсырып:

- Өз бетінше бизнеспен айналысқысы келетіндердің де көшуіне жағдай жасаған жөн. Көшіп келген азаматтарға үй салу ғана емес, ауыл шаруашылығымен айналысу үшін де жер телімдерін беру мүмкіндігін пысықтау керек. Сондай-ақ, оларға мемлекеттік қолдау шаралары қолжетімді болуын қамтамасыз ету қажет,-деген болатын.