Ордабасы ауданының әкімі Бағлан Батыршаев  Шұбарсу ауылының тыныс-тіршілігімен танысты. Алдымен "Шұбарсу Медикал Центр" медицина орталығы, Арал-Эко алабындағы- 600 орындық мектеп құрылысы, Береке алабындағы- жаңа су жүйесі, БЕКАС алабындағы- электр базасы, Б.Нұрлыбеков мектебінің қосымша құрылысын аралап, жылыжай шаруа қожалықтарымен жүздесті. Бұл туралы Ордабасы ауданы әкімдігінің баспасөз қызметі хабарлады. 

Сонымен қатар, Шұбар ауыл округінің Сарытоғай ауылының ауызсу мәселесі және Аққойлы ауылындағы «Ақбастау» бастауыш мектебін аралау барысында тиісті мекеме басшыларына бірқатар тапсырмалар берді. 

Аралау барысында тұрғындармен кездесіп, ауыл ақсақалдарының ұсыныс-пікірлерін тыңдады. Аудан әкімі Бағылан Батыршаев өз сөзінде:

– Мақсатым – ауылдың тыныс-тіршілігімен етене танысу. Өздеріңізбен ашық сұхбаттасып, пікірлеріңізді білу. Біздің тарапымызға келсек, тұрғындарға тиісінше қолдағы бар көмекті көрсетеміз, – деді. 

Сондай-ақ, Ордабасы ауданының әкімі Бағлан Батыршаев ауданның ардагерлер кеңесінің алқа құрамын қабылдады.

Келелі кездесуде аузы дуалы ақсақалдар өз ұсыныс-пікірлерін айтып, қоғамда белең алған түрлі әлеуметтік мәселелерді талқыға салды.

Өз кезегінде аудан әкімі тоғыз жолдың торабында орналасқан Ордабасы өңірінде алда атқарылар жобалармен таныстырды. 

Бағлан Дәнебекұлы ардагерлердің ауданымыздың дамуы мен ішкі тұрақтылығын сақтауға бағытталған ұсыныстары мен тың бастамаларына қолдау көрсететіндігін жеткізді.