Жан-жағы көкжиекпен шектескен далалы Түркістан қаласын жасыл-желекке көмкеру негізгі міндеттердің бірі. Түркістан климаты қолайсыз болғандықтан тұрғындарға жаз күндері қиын тиеді. Жаз ыстығынан қорғану үшін, қаланың көркін ашу үшін мұнда ағаш, гүл егу керек. 

Осы орайда жалпы қала аумағында орналасқан саябақтар мен гүлбақтарды күтіп ұстау бойынша қураған ағаштарды қырқу, шөптерді орып, тазалау жұмыстары жүргізілуде. Жедел мобильді топ анықтаған кемшіліктер шұғыл түрде ретке келтіріледі. Жасыл желектерді суаруда әр түрлі әдістер қолданылады. Ауа райының күрт ысып кетуіне орай, қазіргі таңда аэрация әдісі қолданыла бастады. Бұл өз кезегінде асфальт жолдың ыстық күннен балқуынан сақтап, ыстық ауаның көтерілуіне кері әсерін беріп ылғалдандырады және ауаның жол бойында орналасқан ағаштардың жуылуына септігін тигізеді. 

«Суаруды қарқынды әрі тиімді жүргізу мақсатта, қаладағы көгалдарды автоматтандырылған суару жүйесінің 110 мың шаршы метрі көшірілді. Бұрынғы әдіс бойынша су сепкіш машиналармен суды қашықтан әкелмей, сапалы және уақытылы суаруды қамтамасыз етеді. Мердігер мекеме тарапынан істен шыққан автоматтандырылған жаңбырлатқыш құрылғы толығымен ауыстырылып, қайта қалпына келтіру жұмыстары жүргізілді»,-деді Нұрбол Тұрашбеков. 

Жасыл желекті суару жұмыстарына бақылау күшейтілді. Арнайы көліктермен суару жұмыстары күніне 3 рет жүргізілуде. Сонымен қатар, Түркістан қаласы әкімдігінің «Жасыл-Түркістан» КММ және «Жарық-Тазалық» ЖШС бірлесе Б.Саттарханов даңғылы бойына түнгі сағат 2-ден бастап таңғы сағат 8-ге дейін 8 техника қойылып, үш ауысымдық  түнгі кезекшілік жұмысын жалғастыруда. Түркістанды көгалдандыру және санитарлық тазалықты сақтау мақсатында жалпыхалықтық сенбілік өткізілуде. Індет жүріп жатқандықтан,  адамдардың санитарлық нормаларды сақтауы қадағаланады.