Тудың төмен түсірілуі азаны білдіретіні бәріне мәлім. Мұның мәні неде? Неліктен олай жасалады?

Джулиан Франклиннің «Қалқан мен дулыға: геральдиканың ғылым және өнер ретіндегі сипаттамасы» атты кітабына сәйкес, тудың түсірілуі ХVІІ ғасырда британдық әскери теңізшілерде жолдастарын құрметпен еске алу үшін пайда болған. Басында ту көзге көрінбейтін өлім туына орын босату үшін өз бойымен бірдей биіктікке түсірілген.

Алайда қазіргі таңда тудың түсірілу дәрежесі әр елде әртүрлі. Кейбірі тутұғырдың жартысына дейін түсіреді. Ал Еуропа елдері, мысалы, Ұлыбритания ескі ғұрып бойынша өз биіктігіне тең дәрежеге түсіріледі.

Бір қызығы, ережеге сәйкес аза туын көтеру үшін ең алдымен оны ең жоғарғы нүктесіне дейін көтеріп, содан соң баяу төмен түсіреді. Сонымен қатар аза туын түсіру де дәл осы жолмен іске асады.