Эпидемиялардың адамзат тарихындағы өзіндік орны бар. Кейде соғыстан гөрі індеттің құрбандары көп болған замандар да өтті. Әдетте эпидемия ретінде белгілі-бір географиялық мекенде, мәселен, қалада көптеп шоғырланған адамдардың қандай-да жұқпалы ауруға шалдығуын айтады. Аурудың ауқымы бұл шеңберден де шығып кетсе, пандемияға ұласады.

Шешек ауруы

Бұл қатерлі індетке қарсы қаруды ғалымдар тек 18 ғасырдың соңында таба білді. Оған дейінгі заманда шешек әлемнің түкпір-түкпірінде миллиондаған адамды өлімге душар етті. Тіпті инктер мен ацтектер өркениеттерінің де тамырына дәл осы шешек ауруы балта шапқан деген болжам бар. Әсіресе 18 ғасырдағы шешек ауруының асқынуы үлкен зардап әкеліп, 60 миллион адамды мерт қылды.