Айтсаң жамансың, айтпасаң надансың. Үйдегі сүт кенжеміздің қылығынан қажып біттік. Жасы 25-тен асса да ақылы жоқ. Адам ретінде айтқан ақылды құлағына ілмейді. Ауылдағы қолы бостармен қосылып, арақ ішіп жүреді. Арақ ішкен адамда абырой қайдан болсын?!

Сіңлім бір жыл бұрын ажырасып келген. Содан бері күйзеліске түсті. Күйзелісті арақпен жеңбек болды. Араққа құныққаны сонша бір жарты үшін үйдегі заттарды су тегінге сатуды шығарды. Бәрінен қиыны араққа ақша таппаса көзіне не түссе, бәрін айырбастайды. Өткен жолы анамның қайнатып қойған құртын дүкенге өткізіп жіберіп, бір жартылық алыпты. Одан бұрын теледидарды өткізіп жіберіпті. Кімге бергенін айтпайды. Көршілерден сұрасақ ешқайсысы көрмеген.

Ол ол ма, еркектермен байланысып кез-келген жерде қонып қалатынды шығарды. Ешкімнің сөзін тыңдамайды. Тіпті «мұның не?» деп анам ақыл айтса, оған да қол көтеретінді шығарыпты. Өткен жолы үйге келсем, анам беті көгерген жылап отыр. Не болды десек, сол сіңіліміз араққа ақша бермедің деп белмен ұрыпты.

Мен тұрмыстамын. Бір ағамыз Самарада тұрады. Үйде тек сіңліммен анам ғана. Сіңлімнің жағдайы әлгі. Қартайған анама қарамақ тұрғай қол көтеруге барып жүр. Анамды қолымызға алайық деп ағам да, мен де сонша жалындық. Тыңдамайды.

«Қара шаңырақты тастап қайда барамын? Өлсем осы үйден,өлігім шықсын» деп.

Не істерімді білмей жүрмін. Анамды аяймын.

Гүлзат, Талдықорған қаласы

el24kz