Түркістан қалалық орталық ауруханасында «Инсульт орталығы» мен «Триаж» жүйесімен жабдықталған жаңа қабылдау бөлімінің ашылуы өтті. Аурухананың жұмысымен танысуға Түркістан облысы әкімінің орынбасары Жолдымұрат Аманбаев пен Түркістан облысы денсаулық сақтау басқармасының басшысы Мұқан Егізбаев қатысты. 

Орнатылған электрондық кезекпен ауруханаға келген науқастар өздерінің ауруханаға жату кезегін, лабораторияға, рентген кабинетке, тексерілуге келген науқастар өз кезегін біліп отырады. Ақпараттық киоск (инфокиоск) – науқастардың туыстары жоспарлы және жедел түрде өздері немесе жедел жәрдем бригадасымен келген науқастардың қай бөлімшеде қашан жатқанын білуге мүмкіндік бар. 

«Триаж» жүйесі бойынша медициналық іріктеу үздіксіз және сабақтастықпен жүргізіледі. Бір пациенттің жағдайын бағалау процесі 60 секундтан аспайды. Бағалау аяқталғаннан кейін пациенттер арнайы түрлі-түсті лента түріндегі іріктеу санатының бір түсімен белгіленеді.

Медициналық іріктеуге сәйкес, шартты түрде пациенттер 3 топқа бөлінеді: бірінші топ (жасыл аймақ) – медициналық көмекті аздап қажет ететін және одан әрі амбулаториялық емделу үшін үйіне жіберілген пациенттер және жоспарлы емдеуге жатқызылған науқастар; екінші топ (сары аймақ) – қабылдау бөлімшесіндегі төсекте жатқан шұғыл немесе кезек күттірмейтін көмек көрсетуді қажет етпейтін, сондай-ақ диагнозын нақтылау мен саралауға қалдырылған науқастар; үшінші топ (қызыл аймақ) – қабылдау бөлімшесінде шұғыл және кезек күттірмейтін медициналық көмек көрсетуді қажет ететін науқастар.

Жаңадан сатып алынған Aquilion Prime SP-160 компьютерлік томографы жоғары сапалы CANON технологиясы негізінде әзірленген. Ерекшеліктері Aquilion Prime SP компьютерлік рентгендік сканер 78 см кеңейтілген апертураға ие. Экспозициялық бақылау және итеративті реконструкция сәулеленудің дұрыс деңгейімен жақсы сападағы айқын кескіндерді алуға мүмкіндік береді.