Сәрсенбі, 1 сәуірде Ресей президенті Владимир Путин алғаш рет үкімет мүшелерімен қашықтықтан жиын өткізді. Көрсетілімді "Россия 24" телеарнасы жүргізді, деп хабарлайды Tengrinews.kz порталына сілтеме берген Oinet.kz.  

Жиын барысында Путин Ресейде коронавирустың тарауы мәселесі ушығып бара жатқанын айтты. 

- "Елде жағдай қиындап, әлемде коронавирус мәселесі ушығып барады", - деді Путин. 

Путин коронавирус пен мұнай бағасының түсуі екі жақтан соққы болғанын айтты. Путин Ресей үкіметіне коронавирустың пандемиясына байланысты, оның ішінде ТЖ режимін енгізу және елдің барлық аумағында жоғары дайындық бойынша қосымша тапсырма берді. 

Кремль сайтында жарияланған суреттердің бірінде антисептик тұрғанын аңғаруға болады. Путиннің баспасөз хатшысы Дмитрий Песков ол шын мәнінде де антисептик екенін айтқан. 

Айта кетейік, бүгінде Ресейде барлығы 2777 адам коронавирус індетін жұқтырып, 24 адам қайтыс болған.