«IPay» ЖШС құрылтайшысы Алмас Айменов «Қоғамдық көлік: реформалар және даму жолдары» атты конференция барысында елорда автобустарында жолаушының бет-жүзін тану арқылы жолақы алу жүйесі енгізілетінін айтты, деп хабарлайды OINET.KZ сайтының тілшісі inform.kz сайтына сілтеме жасап.

«Биометрияның көмегімен бет-әлпеттің суреті арқылы төлем жасауды енгізбекпіз. Telegram-да бот құрдық. Онда сіз өзіңіздің ЖСН-ініңді, суретіңізді, автобус картаңызды тіркеу арқылы жүйеге ене аласыз. Одан кейін мәліметтеріңізді пайдалануға рұқсат бересіз. Мұнан ары телефоныңызды немесе төлем картаңызды өзіңізбен бірге алып жүру арқылы автобуста билет сатып ала аласыз», - деді ол.

Жиналыс барысында ол жүйе барынша қауіпсіз екенін қосып өтті.

«Біз қауіпсіздік шегінің критерийлерін көтердік. Жүйеміз 95 пайызға дейін дәл таниды. Егер жүйенің тану деңгейі 80 пайыздан төмен болса, онда жолаушыға камераға тағы бір мәрте қарау туралы өтініш жасалады. Бастапқыдан-ақ жүйе жолақысын төлемеген адамдарды ұстау үшін емес, жолаушылардың қолдануына ыңғайлы болуы үшін жасалған. Шынымен де осы жүйені пайдаланғысы келген жолаушы камераға тура қарап, билет ала алады», - деді Алмас Айменов. 

Компания құрылтайшысының сөзіне қарағанда, төлемнің мұндай жүйесін қолдану барысында жолаушының суреті жүргізуші алдындағы монитордан көрініп тұрады. «Жалпы, бұл толықтай қазақстандық әзірлеме саналады. 

«Осыған ұқсас жүйе болуы да мүмкін. Дегенмен, біздікінің төлем жасауға да мүмкіндігі бар», - деді ол.