Шымкент қаласында «Қазақстан–Ауған бизнес форумы» аясында Ауғанстан тауарларының халықаралық көрмесі өз жұмысын бастады. Ресми ашылу салтанатына Қазақстан Премьер-министрінің орынбасары – Ұлттық экономика министрі Серік Жұманғарин қатысып, шараға келген қатысушыларға сәттілік тілеп, екі ел арасындағы экономикалық байланыстардың маңыздылығына тоқталды.

Министр өз сөзінде Ауғанстан тарапына шақыруды қабыл алып, форум мен көрмеге жоғары деңгейде қатысқаны үшін алғысын білдірді:«Ауғанстанның жоғары басшылығына біздің шақыруымызды қабылдап, форум мен көрмеге қатысуға қолдау көрсеткені үшін ризашылық білдіремін. Ауған халқына бейбіт өмір мен тұрақты даму тілеймін. Бұл көрме – өзара серіктестігіміздің нақты айғағы», — деді Серік Жұманғарин.

Көрмеде Ауғанстанның дәстүрлі және заманауи өнімдері кең көлемде ұсынылған. Мұнда кондитерлік тағамдар, сусындар, жеміс-жидек пен көкөністер, асыл тастар, зергерлік бұйымдар, қолөнер туындылары, кілемдер, былғары және тоқыма өнімдері, сондай-ақ құрылыс материалдары мен тұрмыстық тауарлар қойылған.

Биылғы шараның ерекшелігі – қатысушылар саны мен көрме ауқымының айтарлықтай өсуі. Шымкентке Ауғанстанның бизнес қауымдастығынан 180-ге жуық кәсіпкер келіп, өз өнімдерін таныстыруда. Бұл екі ел арасындағы іскерлік қарым-қатынастың жоғары деңгейін және өзара ынтымақтастықты тереңдетуге деген нақты ниетті көрсетеді.

Форум мен көрменің басты мақсаты – кәсіпкерлер арасындағы тікелей байланыстарды нығайту, бірлескен жобаларды жүзеге асыруға жол ашу және сауда айналымын арттыру. Сарапшылардың пікірінше, мұндай кездесулер аймақтық экономиканың дамуына оң ықпал етеді.

Қазақстан Ауғанстанды Оңтүстік және Орталық Азия өңіріндегі маңызды серіктестердің бірі ретінде қарастырады. Соңғы жылдары әлемдік экономикалық қиындықтарға қарамастан, екі ел арасындағы сауда көлемі тұрақты өсіп келеді. Қазақстандық ауыл шаруашылығы өнімдері, әсіресе бидай, ұн, май және қант Ауғанстан нарығында үлкен сұранысқа ие.

Серік Жұманғарин атап өткендей, Қазақстан тек өз өнімдерін экспорттап қана қоймай, ауған тауарларының да ішкі нарыққа шығуына мүмкіндік жасап отыр: «Біздің мақсатымыз – тек экспортты ұлғайту емес, өзара тиімді серіктестікті дамыту. Шымкентте өтіп жатқан бұл көрме – осының айқын дәлелі. Біз Ауғанстанмен сауда, көлік-логистика және энергетика бағыттарындағы ынтымақтастықты одан әрі кеңейтуге ниеттіміз», — деді министр.

Көрменің төрт күнге жоспарланғанын айта кеткен жөн. Осы уақыт аралығында шымкенттіктер мен қала қонақтары Ауғанстанның ұлттық мәдениетімен, қолөнер дәстүрімен және өнімдерімен жақынырақ танысу мүмкіндігіне ие болады. Іс-шара барысында екі елдің кәсіпкерлері арасында келіссөздер өтіп, жаңа экспорттық келісімдерге қол қойылады деп күтілуде.

Шымкенттегі бұл көрме Қазақстан мен Ауғанстан арасындағы экономикалық және мәдени байланыстарды нығайтуға бағытталған маңызды қадам болып отыр. Мұндай іс-шаралар елдер арасындағы өзара сенімді арттырып қана қоймай, өңірлік сауданың дамуына және экономикалық тұрақтылыққа жаңа серпін береді.