Шымкент қаласында жылу беру маусымына дайындық жұмыстары қарқын алды. Қаладағы негізгі жылу көздерінің бірі – «3-Энергоорталық» акционерлік қоғамы — алдағы қысқы маусымға толық дайын екенін мәлімдеді.

Кәсіпорында өткен баспасөз туры барысында мекеменің бас инженері Бақыт Жолдыбаев нысанда атқарылған жөндеу және жаңғырту жұмыстарының барысымен таныстырды.

1,5 миллиард теңгелік инвестиция – жылу сапасын арттыруға бағытталды

Инженердің айтуынша, 2025 жылға арналған жөндеу жұмыстарына 1,5 миллиард теңге көлемінде қаржы бөлінген. Бұл қаражат есебінен жылу қазандықтары мен негізгі жабдықтар жаңартылып, жүйелердің тиімділігі арттырылған.

– Жыл басынан бері екі қазандық агрегаты күрделі жөндеуден өтті. Қазіргі таңда үшінші қазандықтағы жұмыстар аяқталуға жақын. Сонымен қатар, бірінші қазандыққа ағымдағы жөндеу жүргізілуде. Барлық жоспарлы іс-шаралар 30 қыркүйекке дейін толық аяқталады. Жалпы, кәсіпорын қысқы маусымға толық дайын, – деді Бақыт Жолдыбаев.

Инвестициялық бағдарлама аясында қазандықтар мен бу турбиналарының негізгі тораптары жаңартылып, қауіпсіздік және энергия үнемдеу технологиялары енгізілді. Бұл – алдағы жылыту маусымында қала тұрғындарын үздіксіз әрі сапалы жылумен қамтамасыз етуге мүмкіндік береді.

«3-Энергоорталық» өткен жылы да жоспарға сай жұмыс істеп, қаланың әлеуметтік нысандары мен тұрғын үйлерін тұрақты жылумен қамтамасыз еткен. Биылғы маусымда да мекеме осы дәстүрді сақтап қалуға ниетті.

Шымкент қаласының әкімдігі мен энергетика басқармасы жылыту маусымына дайындықты тұрақты бақылауда ұстап отыр. Қаладағы барлық жылу көздері мен инженерлік инфрақұрылым нысандары кезең-кезеңімен тексерілуде.

Қазіргі таңда тұрғын үйлер мен әлеуметтік нысандардың 90 пайыздан астамы жылу қабылдауға дайын. Жөндеу жұмыстары жоспарлы түрде аяқталып, гидравликалық сынақтар жүргізіліп жатыр.

Шымкент әкімдігі өкілдерінің айтуынша, жылу маусымының уақтылы және тұрақты өтуі – қала тұрғындарының тұрмыс сапасын қамтамасыз етудегі маңызды бағыттардың бірі.

– Қаланың энергия кешенін жаңғырту және тиімділігін арттыру жұмыстары жүйелі түрде жалғасады. Біздің мақсат – тұрғындарға сапалы қызмет көрсету, энергия шығынын азайту және жылу жүйесін үздіксіз ету, – делінген әкімдік хабарламасында.

Жалпы, «3-Энергоорталықтың» дайындық жұмыстары Шымкенттің энергетикалық қауіпсіздігін нығайтып, алдағы қысқы кезеңді тұрақты әрі апатсыз өткізуге негіз қалайды.