Шымкент қаласында экологиялық мәдениетті арттыруға және табиғатқа ұқыпты көзқарасты қалыптастыруға бағытталған республикалық «Таза Қазақстан» экологиялық акциясы жалғасуда.

Бүгін қала әкімі Ғабит Сыздықбеков жергілікті тұрғындармен бірге «Астана» шағын ауданында көшет отырғызу жұмысына қатысты. Егілген ағаштар қаланың көгалдандыру жүйесін толықтырып қана қоймай, тұрғындар мен қонақтар үшін қолайлы орта қалыптастырады.

Іс-шара барысында мегаполис басшысы мұндай игі бастамалардың маңыздылығын атап өтті:

—  Ағаш отырғызу – болашақ ұрпаққа жасалған қамқорлық. Мұндай шаралар қоршаған ортаға деген жауапкершілікті арттырып қана қоймай, қоғамның бірлігін нығайтады. Әрбір тұрғын өз қаласының тазалығы мен әсем келбетіне үлес қосуы тиіс, – деді Ғабит Сыздықбеков.

Сондай-ақ, күзгі көгалдандыру маусымы аясында Шымкент қаласының орталық көшелерінде, саябақтар мен гүлзарларда, сондай-ақ аулаларда ағаш отырғызу жұмыстары қарқынды жүріп жатыр. Бұл шаралар жасыл инфрақұрылымды дамытуға және тұрғындардың өмір сапасын арттыруға бағытталған.

Бұл бастама ең алдымен, жергілікті билік пен халық арасындағы ынтымақтастықтың айқын көрінісі. Әкімнің өзі тұрғындармен қатар ағаш егіп, еңбекке араласуы қоғам мүшелеріне үлгі болып, әрбір азаматтың туған жер алдындағы жауапкершілігін арттырады. Мұндай іс-шаралар халықтың экологиялық мәдениетін қалыптастырып қана қоймай, туған қаласына деген сүйіспеншілігін де күшейтеді.

Ағаш отырғызу – жай ғана табиғатты көркейту емес, ол жасыл болашаққа деген инвестиция. Бір түп ағаш ауаны тазартып, жылдар бойы қаланың экожүйесін жақсартады. Сондықтан бұл акцияның экологиялық әсері де, әлеуметтік ықпалы да зор. Әсіресе мегаполис саналатын Шымкент үшін жасыл белдеуді кеңейту – тұрғындардың өмір сапасын арттырудың маңызды тетігі.

Шымкент қаласы әкімінің баспасөз қызметі