Қазіргі таңда Түркістанда мәдениет пен өнерге айрықша көңіл бөлініп келеді. Руханиятты дамытуға арналған тың жобалар іске асуда. Республикалық, халықаралық деңгейдегі симпозиумдар, өнер фестивалдары өтіп келеді. Соның бірі Республика күніне орай ұйымдастырылған халықаралық «Voice of Turan-2024» қазақ әндерін орындаушылар байқауы. Бүгін облыс әкімінің бірінші орынбасары Зұлпыхар Жолдасов фестиваль қонақтарымен кездесіп, Индонезияның Қазақстандағы Төтенше және өкілетті елшісі Мохамад Фаджрул Рахманды арнайы қабылдады. Екі ел арасындағы туристік байланыстарды нығайтуға уағдаласты. Бұл туралы Түркістан облысы әкімінің баспасөз қызметі хабарлады.

– Түркі әлемінің рухани орталығына айналған қасиетті Түркістан қаласына қош келдіңіздер! Өнер – ұлттың жаны, рухы, бар бітім-болмысын айшықтап тұратын ерекше құбылыс. Бүгін әлемнің әр қиырынан келген талантты жастарды қасиетті қаламызда көргенімізге қуаныштымыз. Сонымен қатар өзіңіз бастаған Индонезия елшілігіне қолдауларыңыз үшін алғысымды білдіремін. Байқау алдында өздеріңізбен арнайы жолығып, ізетімді білдіруді жөн санадым. Өздеріңізбен кездесу барысында да екі ел арасындағы мәдени-рухани байланыстарды дамыту бағытындағы ұсыныстарыңызды тыңдап, бірлесе жұмыс атқаруға дайын екенімізді жеткізгім келеді. Түркістан қаласына сапарларыңыздың бүгінгі рухани шарамен байланысты болғанына шын қуаныштымын. Алдағы уақытта да елдер арасындағы байланыстарды берік нығайтып, рухани-мәдени бағытта бірлесе атқарар жобаларымыз мол болады деп сенемін, – деген Зұлпыхар Сансызбайұлы өңірдің мәдени-туристік әлеуетін таныстырды.

Тұран дауысын тамашалауға келген Индонезияның Қазақстандағы Төтенше және өкілетті елшісі Мохамад Фаджрул Рахман өз кезегінде жаңарған Түркістан қаласы туралы әсерін жеткізді. Индонезия елі жайлы жан-жақты мағлұмат берді. Аталған мемлекеттен қатысып жатқан индонезиялық әнші Тарраринге сәттілік тіледі. Екі ел арасындағы байланыстың нышаны ретінде естелікке сый-сияпат табысталды.

Түркістанның терең тарихына және жаңа келбетіне қызығушылық танытып келетін туристер саны күн санап артып отыр. Оларға лайықты қызмет сапасын арттыру, тарихи орындармен қатар, жаңадан бой көтерген мәдени нысандарды рухани бағыттағы шараларға деген қолжетімділіктерін арттыру мақсатында өңірде жүйелі жұмыстар қолға алынған.

Айта кетейік, қазақ әндерін әлемдік деңгейде насихаттауды мақсат еткен байқаудың жыл сайын ауқымы ұлғайып келеді. 2 рет онлайн режимде ұйымдастырылған фестиваль 5 жылдан бері халықтық мерекеге айналып үлгерді. Биылғы байқауға 16 елден келген қатысушылар «Конгресс Холл» кешенінде екі күн бойы өз бақтарын сынамақ.