Әрбір отбасының басты мақсаты  - баспаналы болу. Әсіресе бұл ірі қалаларда үлкен проблемаға айналған. Халқының саны жылдан жылға артып келе жатқан үшінші мегаполисте тұрғын үй мәселесі оңынан шешіліп келеді. Әсіресе шаһарда мемлекеттің қолдауымен тұрғындарға қолжетімді баспаналардың құрылысы қыза түскен. Сондай-ақ мемлекеттік бағдарламалар аясында көптеген отбасыларға баспана кілті табысталуда. 

Ендігі кезекте тұрғын үй кезегіндегі азаматтардың «Шаңырақ» бағыты арқылы баспаналы болуға мүмкіндігі бар. «5-10-20 Шаңырақ» бағытының талаптарына сәйкес, тұрғын үй кезегінде тіркелген төлемге қабілетті барлық санаттағы азаматтардың өтінім жіберу мүмкіндігі қарастырылған. Аталған бағыт «Нұрлы жер» мемлекеттік бағдарламасы аясында несиелік бағытта жеңілдетілген пайыздық көрсеткішке ие.

Мұнда азаматтарға қойылатын басты талаптар - отбасының жиынтық табысы ең төменгі күнкөріс деңгейінің 3,7 еселенген шамасынан (2021 жылға - 126 917 теңге) аспауы тиіс.Азаматтарға  жаңа  тұрғын үй сатып алуға берілетін қаражат көлемі – 15 млн теңге. Бұл сома жылдық мөлшерлемесі 5 пайыз, алғашқы жарна 10 пайызбен 20 жылға несиелік негізде рәсімделеді. Аталған бағыт бойынша өтінімдерді қабылдау «Отбасы банкі» интернет ресурстары арқылы жүргізіледі.  

Айта кету керек, биыл Шымкент қаласы бойынша «Нұрлы жер» мемлекеттік бағдарламасы аясында «Шаңырақ» бағытымен тұрғын үй кезегінде тұрған 1728 азамат несиелік баспанаға қол жеткізеді.