Елбасы Нұрсұлтан Назарбаев «Болашаққа бағдар: Рухани жаңғыру» атты бағдарламалық мақаласында: «Еліңді құрметтеу, туған өлкенің тарихын танудан, адамдарын ардақтаудан басталады» - деп атап, туған жерге деген құрметтің бағасы жоғары және ондағы әрбір адамның орны бөлек екенін жеткізді. 

Осы орайда, ардагерлерге және Отанға деген құрметтің негізі ретінде Бәйдібек ауданының 50-ге жуық ардагерлері мен зиялы қауым өкілдері күннен күнге түрленіп, гүлденіп келе жатқан Түркістан шаһарын аралады. Облыс әкімінің тапсырмасымен жүзеге асқан саяхат әуелі "Сапар орталығынан"  және Түркі әлемі Түркістанның жүрегі саналған Қожа Ахмет Ясауи кесенесіне зиярат етуден басталды. 

Сондай-ақ, олар "Екінші Венеция" аталатын "Керуен сарай" кешені мен Түркістанның өткені мен бүгінінен хабар беретін "Ұлы дала" орталығы және "Алтын Самұрық" ғимараты ішіндегі ұшатын театрды тамашалады. 

Бүгінде адам танымастай өзгерген шаһардың көркіне ардагерлер мен зиялы қауым өкілдері таңданыстарын жеткізіп, сапарды ұйымдастырушыларға алғыстарын білдірді.   

Ардагерлерге құрмет - бүгінгі жастардың басты міндеті. Себебі, кешегі қан майдандағы арпалыстар, қиын қыстау кезеңдер бүгінгі болашақ үшін алаңдаушылықтан туындаған ұмтылулар екенін ұмытпағанымыз жөн.