«Заң мен тәртіп» қағидатын іске асыру аясында Ә. Қуатбеков атындағы Халықтар достығы университеті мен Энергетика және байланыс колледжінде жастардың қатысуымен ақпараттық-түсіндіру кездесулері өтті. Жиындарда қоғамдық келісімді нығайту, жалпыұлттық бірлік құндылықтарын дәріптеу және жастардың азаматтық жауапкершілігін арттыру мәселелері талқыланды.

Кездесулерге Шымкент қаласы ішкі саясат басқармасының «Қоғамдық келісім» КММ қызметкері Н. Абдукаримов, қалалық Дін істері басқармасының «Дін мәселелерін зерттеу орталығы» КММ теологы Н. Аманкелді және Жастар ресурстық орталығының маманы Ж. Аязбек қатысты. Мамандар жастармен пікір алмасып, қоғамдағы татулық пен тұрақтылықты сақтаудың маңызына тоқталды.

Іс-шара барысында Қазақстандағы қоғамдық келісім мен жалпыұлттық бірліктің мәні түсіндірілді. Түрлі этнос пен мәдениет өкілдерінің өзара сыйластығы, азаматтардың ортақ құндылықтарды құрметтеуі және қоғам өміріне жауапкершілікпен қарауы тұрақтылықты сақтауда маңызды екені айтылды. Сонымен қатар жастардың күнделікті қарым-қатынаста өзге адамның пікірі мен көзқарасын ескеріп, келіспеушіліктерді өзара түсіністік арқылы шешуіне назар аударылды.

Кездесулердің тағы бір бағыты діни сауаттылықты арттыруға арналды. Теолог маман жастарға діни мазмұндағы ақпаратты саралап қабылдау, күмәнді дереккөздерге сын көзбен қарау және тексерілген мәліметтерге сүйену қажеттігін түсіндірді. Әсіресе әлеуметтік желілерде таралатын ақпараттың мазмұнын бағалай білу мен жалған мәліметке ермеудің маңызы сөз болды. Діни сауаттылықтың қалыптасуы адамның өз ұстанымын дұрыс айқындауына және өзге көзқарастарға құрметпен қарауына ықпал етеді.

Жиында толеранттылық, өзара түсіністік және азаматтық жауапкершілік ұғымдары да кеңінен қозғалды. Қоғамдық келісім тек түрлі топтардың бейбіт өмір сүруімен шектелмейді. Ол әр азаматтың заң талаптарын сақтауынан, өзгенің құқығын құрметтеуінен және ортақ тәртіпке жауапкершілікпен қарауынан көрінеді. Сондықтан жастар арасында осы ұстанымдарды орнықтырудың маңызы атап өтілді.

Қатысушылар өздерін қызықтырған сұрақтарын қойып, мамандармен пікір алмасты. Ашық форматта өткен кездесулерде қоғамдық бірлік, діни сауаттылық және қоғамдағы тұрақтылықты сақтау мәселелері талқыланды.