Түркістан облысы,  Сайрам ауданы, Ақсукент ауылдық округінде арнайы техника шығаратын зауыттың құрылысы басталып, өңірдің индустриалдық әлеуетін арттыру бағытында жаңа кезең ашылды. 

Осы жобаның іске қосылуы, бір жағынан, өңір экономикасының дамуына жаңа серпін береді, екінші жағынан, ауыл шаруашылығы, құрылыс және коммуналдық қызметтер сияқты салаларға қажетті техникаларды жергілікті өндірістен қамтамасыз етуге мүмкіндік тудырады.

Жоба аясында «Завод Автотехнологий» жауапкершілігі шектеулі серіктестігі арнайы техника құрастыруды қолға алуда. Бұл техника жол жөндеу, коммуналдық қызметтер мен құрылыс салаларына қажетті арнайы көліктер мен машиналардан тұрады. Нақтырақ айтқанда, зауыт жол жөндеу техникаларын (асфальт жабатын машиналар, грейдерлер, экскаваторлар), коммуналдық қызметтерге арналған техникаларды (қар тазартқыштар, сұйықтық тарату машиналары, қоқыс тиейтін машиналар) және құрылыс саласына қажетті құрылыс техникаларын (құрылыс крандары, тиегіштер, бетон араластырғыштар) өндіретін болады.

Құрылыс жұмыстарын жүргізіп жатқан кәсіпорынның басшылығы мен мамандары жаңа өндіріс үшін заманауи технологиялар мен құрал-жабдықтарды қолданады. Бұл жобаның маңызды ерекшелігі — оның елеулі әлеуметтік-экономикалық әсері. Өндіріс толық іске қосылғанда, 80 жаңа жұмыс орны ашылады. Бұл жұмыссыздық деңгейін төмендетуге және өңірдің жұмыс күшін біліктілігін арттыруға мүмкіндік береді.

Жобаға қаржылық қолдау ретінде мемлекет тарапынан жеңілдетілген несиелер ұсынылып, жеке инвестициялар тартылып отыр. Ал бұл өз кезегінде елдің индустриалдық саясатын қолдауға және өңірлердегі кәсіпкерлікті дамытуға бағытталған тағы бір нақты қадам болып табылады.

Зауытта шығарылатын техниканың 80 пайызы Қазақстанның ішкі нарығына бағытталса, қалған 20 пайызы шетелге экспортталады. Осылайша, елдің машина жасау саласының дамуымен қатар, халықаралық нарықта бәсекеге қабілетті өнімдер шығару жолында да жаңа мүмкіндіктер ашылуда. Сонымен қатар, жаңа өндіріс орнының құрылыс жұмыстары мен өндірістік процестердің тиімділігі аймақтық сауданың дамуына, тұтынушылардың құқықтарын қорғауға да үлесін қосады.

Бұл жоба «Қазақстанның индустриалдық-инновациялық дамуы» стратегиясы аясында жүзеге асырылып, аймақтың әлеуметтік-экономикалық жағдайын жақсартуға, тұрақты жұмыспен қамтуға және халықтың өмір сапасын арттыруға жол ашады.

С.АБЫЛБЕКОВА