Қасиетті Құранда: «Маған және ата-анаңа шүкір ет…» - деген аят бар. («Лұқман» сүресі, 14-аят)

Ал осындағы "Ата-анаңа шүкір ет" деген сөз нені білдіреді? Аятты түсіндірген тәпсір ғалымдары "Ата-анаға шүкірлік етудің" көріністері деп мыналарды көрсетеді:

- Олардың жанында телефон шұқыламау, яғни көңіл бөлу;

- айтқандарына құлақ салу, мұқият тыңдау;

- кез келген мәселеге олардың көзімен қарап, жағдайды олардың деңгейімен бағамдай білу;

- әңгімелеріне құлақ асу;

- оларға мейіріммен, құрметпен қарау;

- олардың барына алғыс айтып, риза болу, құшақтау;

- екеуіне ең әдемі, жылы сөздеріңізді арнау;

- оларға қабақ түйіп емес, күлімдеп қарау;

- тек жақсы жаңалықтарыңызды айтып қуанту;

- кейбір келеңсіздіктерді, жаман хабарларды олардан жасырып қалу, жүректерін ауыртпау, уайымға салмау;

- олардың достарына құрметпен қарау. Тіпті, ата-анаңыз көз жұмып кетсе де, олардың жолдастарына құрмет көрсету - құптарлық іс болып саналады.

- Олардың сіздерге жасаған жақсылықтарын үнемі еске алып жүру, ұмытпау;

- ренжіткен тұстары болса ұмыту;

- бірдеңені он қайтара айтса да, бірінші рет естіп тұрғандай тыңдау, мән беру;

- олардың қасында басқалармен сөйлесіп кетпеу;

- сөздерін бөлмеу;

- сын айтпау;

- олардың жанында әдеп сақтап отыру;

- олардың жасын сыйлау;

- олардың көзінше немерелеріне ұрыспау;

- айтқан ақыл-кеңестеріне құлақ түру;

- үйдегі маңызды мәселелерді олардың ақылымен, жол көрсетуімен шешу;

- оларға дауыс көтермеу;

- алдарын кесіп өтпеу;

- олардан бұрын тамаққа қол созбау;

- олармен үнемі мақтану;

- олардың көзінше теріс қарап отырмау;

- басқаларға екеуін жамандамау;

- аттарын айтпай, жұмсақ сөзбен шақыру;

- олардың ұрысқанына, т.б сөздеріне сабырмен қарау, сөз қайтармау;

- олар үшін үнемі дұға жасау, тура жол, жақсылық сұрау;

- оларға шаршағаныңызды көрсетпеу;

- олардың қателіктеріне мысқылдамау, кекетпеу;

- өтініштерін аяқ асты етпеу, тапсырғандарын орындау;

- алыста болса, оларға жиі барып тұру, жағдайын үнемі сұрап жүру;

- олармен сөйлескенде әр сөзге мұқият болу, көңілдеріне қаяу салатын сөз айтып қоюдан тыйылу;

- олардың бар болғанына шын қуану, шүкірлік таныту;

- Алладан оларға жақсылық жасауға мүмкіндік беруін сұрау, тілеу, сол жолда әрекет ету.

Ата-ана бұл - перзенттің Жәннатқа кірер кілті, жұмақтың тұтқасы. Сіздің бұл өмірде жолыңыздың болуы мен ісіңіздің оңынан шешілуі, арғы өмірде Алланың разылығын алып, Ақыретіңіздің жемісті болуы - олардың батасымен тікелей байланысты. Ендеше, ата-анаңызға лайықты түрде шүкір етіңіз, құрметті замандас!