Эпидемиялардың адамзат тарихындағы өзіндік орны бар. Кейде соғыстан гөрі індеттің құрбандары көп болған замандар да өтті. Әдетте эпидемия ретінде белгілі-бір географиялық мекенде, мәселен, қалада көптеп шоғырланған адамдардың қандай-да жұқпалы ауруға шалдығуын айтады. Аурудың ауқымы бұл шеңберден де шығып кетсе, пандемияға ұласады.

«Испанка»

Еуропаны Бірінші Дүниежүзілік соғыстан гөрі Испаниялық тұмау титықтатты. 20 ғасырдағы ең қасіретті пандемияның бірі ретінде танылған бұл індетке кезінде жер шары халқының үштен бір бөлігі шалдыққан екен. 18 ай ішінде бұл вирус шамамен 100 миллион адамның өмірін жалмап үлгерді. Кейіннен испаниялық тұмауының штаммы H1N1 атауына ие болды.