Негізі мен ешуақытта әнге сөз жазам-ау деп ойламаппын. Аяқ астынан түрткі болды ғой. 90-жылдары Ұзынағашта тамыз оқиғасы деген қақтығыс орын алды. Сол кезде ел-жұртты басынған кавказдықтарға қарсы мыңдаған қазақ жігіттері қарсы шығып, Кавказына шығарып салды. Біздің елдің жігіттері халықтың рухын көтеріп, тура Желтоқсандағыдай көшеге шықты. Осы кезде біздің жаққа келген сазгер Жәкен Омаров: "Әй, Есаға, сіздің елдің жігіттері-ай!" — деп риза болды. "Мынауың ғажап екен, мен қазір "Біздің елдің жігіттері" деген өлең жазам", — дедім де, босағада отырып өлең жаздым. Оған сол сәтте-ақ Жәкен ән шығарды. Сөйтіп бас-аяғы 30-40 минуттың ішінде дүниеге жаңа ән келді.