Шымкент – еліміздің туризм саласына үлес қосатын бірден-бір қонақжай, көрсетері көп қала. Қазақстан Республикасының туристік саласын дамытудың 2019 – 2025 жылдарға арналған мемлекеттік бағдарламасының жобасы аясында бүгінде қалаға туристердер тарту мақсатында біршама іс-шаралар атқарылуда. Оның ішінде зиярат етуге келетін қонақтардың көп екенін ескеріп, тарихи ескерткіштер, мұнаралар аумағына жіті көңіл бөлінуде. 

– Шымкентте Мұса пайғамбардың серігі саналатын Қызыр Пайғамбардың 18-19 ғасырларға тән тарихи мұнарасы бар. Сайрам тұрғын алабында орналасқан бұл нысан – туристік, мәдени, ерекше нысандарымыздың бірі. Мұнара әлемге әйгілі Пизан мұнарасы секілді 15’С-қа оңға қарай қисайған. Нысанның биіктігі 10,5 м болып, жер сілкінісінің нәтижесінде қазір 5,7 метрге жеткен, – деді М.Исахов.

Осы орайда қала әкімінің орынбасары аталған нысанға құрылыс жұмыстары жүргізілуі қажет екенін атап өтті.

– Кейінгі кезде мұнараның, өзге де ескерткіштердің сыртқы келбеті нашарлап, күтіп-баптауды, құрылыс жұмыстарын жүргізуді қажет етуіне байланысты біздің туризм орталығы меценаттардың көмегімен жаңа жобаны қолға алып жатыр. Жобаға алғаш болып қаламыздың тұрғыны, меценат Бауыржан Мырзатаев мырза демеушілік көрсетіп, тарихи мұнараның аумағын абаттандыруға қолғабыс жасап, жөндеу жұмыстарын жүргізуде. Аяқталған соң, тағы бөлісе жатармыз, – деді Мақсұт Пернебайұлы. 

Айта кетейік, бүгін Шымкент қаласында 18 наурыз «Игі істер» күніне орай Мақсұт Исахов: «Сүйікті қаламызды бірге көркейтейік!» деп, нысан ауласына ағаш көшеттерін отырғызды.