Түркістан облысының орталығы атанған Түркістан қаласында баспана мәселесі оңынан шешіліп келеді. Мәселен жақында ғана «Отырар» ықшам ауданында салынған көпқабатты тұрғын үй пайдалануға берілді. Тұрғын үй «Нұрлы жер» бағдарламасы аясында салынған.  

Жаңа пәтердің кілттерін  облыс әкімі Өмірзақ Шөкеевтің өзі қоныс иелеріне салтанатты түрде табыс етті.  Енді мұнда  15 түркістандық отбасы көшіп келмек.  Бұл жолы пәтер иелері атанғандар – кезекте тұрған халықтың әлеуметтік аз қамтылған және тұрғын үйге мұқтаж санатына жататын азаматтар. Жаңа баспана иелеріне арнап бірден 5 қабатты 11 тұрғын үй берілді. бір бөлмелі 165 пәтер, екі бөлмелі 165 пәтер және 3 бөлмелі 330 пәтер игілігіне беріліп, 660 отбасы қоныс тойын тойлады. Қолданысқа берілген бұл көп қабатты тұрғын үйдің инфрақұрылымдары толықтай ретке келтірілген. Жарық тартылған, судан тапшылық жоқ. Жылу мәселесі де шешілген. Пәтерлер талапқа сай жасақталып, әдемі әрленген. Барлық пәтерлерге қажетті коммуникациялар түгелдей жасалаған. Кілт табыстау рәсімі мұнымен тоқтап қалмады, облыс әкімі жаңа пәтерге қоныстанған жанұяны құттықтай келе пәтер табалдырығын бірге аттап, өзінің жылы лебізін білдірді. Ал, баспаналы болған отбасы мүшелері көптен күткен үйге қол жеткізгендеріне алғыстарын білдіріп, қуанышты сәттерімен бөлісті. Іс-шараға жиналған көпшілік назарына концерттік бағдарлама ұсынылды. Жыл соңына дейін қала тұрғындарына 5 қабатты 9 тұрғын үй қолданысқа беріледі.