Қазақстанда жүргізуші куәлігін алу рәсімін жетілдіру бойынша жаңа шаралар қабылданды. Бұл мәселе ҚР Премьер-министрінің орынбасары — жасанды интеллект және цифрлық даму министрі Жаслан Мәдиевтің төрағалығымен өткен кеңесте қаралды, деп жазады Оinet.kz.

Үкіметтің баспасөз қызметінің мәліметінше, жаңашылдықтар емтихан процесінің ашықтығын арттыруға, сыбайлас жемқорлық тәуекелдерін азайтуға және азаматтарға қолайлы жағдай жасауға бағытталған.

Енді жүргізуші куәлігін алу үшін емтиханды ақылы негізде шектеусіз тапсыруға болады. Алайда әр әрекет арасындағы аралық кемінде 10 күн болуы тиіс. Бұған дейін азаматтарға тек үш тегін мүмкіндік беріліп, одан кейін қайта оқудан өту міндеттелетін.

Сонымен қатар, Астанадағы Ұлттық тестілеу орталығы базасында академиялық адалдықты қамтамасыз ету технологиялары пилоттық режимде сынақтан өтеді. Бұл жүйе кейін барлық теориялық емтихандарға енгізілуі мүмкін.

Емтихан процесіне жасанды интеллект те тартылмақ: теориялық сынақта толықтырылған шынайылық (AR), ал практикалық кезеңде компьютерлік көру технологиялары қолданылады. Бұл заңбұзушылықтарды анықтауды жеңілдетеді.

Бұдан бөлек, цифрлық жүйелердің ақпараттық қауіпсіздігі күшейтіліп, оларды маңызды инфрақұрылым қатарына енгізу қарастырылып отыр. Заңсыз араласқан тұлғаларға қылмыстық жауапкершілік көзделуі мүмкін.

Жаңа ережелерге сәйкес, емтихан кезінде заң бұзғандарға әкімшілік жауапкершілік енгізіледі. Тыйым салынған құрылғыларды қолданғандар 1 жылға дейін теориялық емтихан тапсыру құқығынан айырылуы мүмкін.

Сондай-ақ автомектептерге қойылатын талаптар күшейтіліп, оларды лицензиялау жоспарланып отыр. Оқыту сапасы төмен болған жағдайда лицензиядан айыру шарасы қолданылады.

Жалпы, бұл өзгерістер жүргізуші куәлігін алу жүйесін әділ әрі қолжетімді етуге бағытталған.