Уақтысында Оңтүстік, Түркістан облыстары әкімінің орынбасары, Шымкент қаласы әкімінің бірінші орынбасары болып, одан кейін біраз жылдар биліктен алыстап кеткен Ербол Садыр Абай облысы әкімдігінен қызмет алды. Ол  өзінің бұрынғы әріптесі Берік Уәлидің орынбасары болып тағайындалды.  Аймақ басшысы бүгін оны облыс активіне таныстырды.

Ербол Әбілхайырұлы 1973 жылы туылған, білімі жоғары, мамандығы бойынша экономист.  Еңбек жолын 1994 жылдан Созақ аудандық орталық ауруханасы бас дәрігерінің экономика жөніндегі орынбасары болып бастаған.

Әр жылдары Оңтүстік Қазақстан облысы Созақ ауданы Шолаққорған ауылында Экономика бөлімінің бас маманы, Экономика және шағын кәсіпкерлікті қолдау бөлімінің меңгерушісі, Оңтүстік Қазақстан облысы Кәсіпкерлікті қолдау басқармасы басшысының орынбасары, Экономика және бюджетті жоспарлау басқармасының басшысы қызметтерін атқарған.

Оңтүстік Қазақстан, Түркістан облыстары әкімінің орынбасары, Шымкент қаласы әкімінің орынбасары, бірінші орынбасары болып еңбек етті.