​Шымкент: Биыл 5 мыңнан астам жасөспірім әскери есепке алынады

Oinet.kz 12-02-2021 699

Бүгін Ақпараттық-коммуникациялық орталығында Шымкент қаласының Қорғаныс істері жөніндегі департаменті бастығының орынбасары Әжімұхан Шынтаевтың қатысуымен азаматтарды мерзімді әскери қызметке шақыру және шақыру учаскілеріне тіркеу тәртіптері бойынша баспасөз мәжілісі өтті.

image.png

Брифинг барысында Әжімұхан Қалмаханұлы азаматтарды әскери есепке алу және олардың әскери қызметке жарамдылық дәрежесін анықтау туралы сөз қозғады.

– Биыл Шымкентте 5 мыңнан астам жасөспірімді әскери есепке қою жоспарланды. Ал әскери қызметке өткен жылы қалада 1500-ге жуық азамат шақырылды. Осы жылдың көктемгі науқанында 700-ден астам азаматты әскер қатарына шақыруды көздеп отырмыз. Бұл ретте болашақ Отан қорғаушылар мен олардың ата-аналары әскери есепке қою барысына түсіністікпен және жауапкершілікпен қарағаны абзал екенін айтқым келеді, – деді Ә.Шынтаев.

Спикердің сөзінше, әскери есепке 17 жасқа толған немесе сол жылы толатын Қазақстан Республикасының ер азаматтары жатады. Ал әскери есепке алуға жатпайтындар – әскери-есептік мамандығы жоқ әйелдер, заңнамаға сәйкес әскери міндеттерін орындаудан босатылған адамдар, бас бостандығынан айыру түрінде жазасын өтеп жүргендер және Қазақстан Республикасынан тыс жерлерде тұрақты тұратындар. 

Брифингте белгілі болғандай, әскери қызметке шақыруға жататын азаматтардың медициналық тексеруден өту кезеңінде жұмыс орны мен орташа жалақысы, ал мерзімді әскери қызмет ету кезеңінде жұмыс орны сақталады. Әскери қызметке шақыруды кейінге қалдыру аудандық әскерге шақыру комиссиясының шешiмi бойынша беріледі. Нақтырақ айтсақ, отбасы жағдайлары, білім алуды жалғастыру, денсаулық жағдайы және басқа да себептер бойынша кейінге қалдырылады.

Ескерте кетейік, әскери есепте тұрған немесе тұруға мiндеттi азаматтың жергiлiктi әскери басқару органының шақыруы бойынша көрсетілген мерзiмде себепсіз келмеуi 5 АЕК мөлшерiнде айыппұл салуға әкеп соғады. Ал әскери қызметтен босатуға заңды негiздер болмаған кезде әскери қызметке шақырылудан жалтару 1000 АЕК-ке дейiнгi мөлшерде айыппұл салуға, сол мөлшерде түзеу жұмыстарына, бір жылға дейiнгi мерзiмге бас бостандығын шектеуге немесе сол мерзiмге бас бостандығынан айыруға жазаланады. Одан бөлек, өзiнiң денсаулығына зиян келтiру арқылы аурумын деп жалған сылтаурату, жалған құжат жасау немесе өзге де алдау арқылы жасалған іс-әрекет 3000 АЕК-ке дейiнгi мөлшерде айыппұл салуға, сол мөлшерде түзеу жұмыстарына, үш жылға дейiнгi мерзiмге бас бостандығын шектеуге немесе сол мерзiмге бас бостандығынан айыруға жазаланады.

Айта кетейік, әрбір адам тұрғылықты жері бойынша жергілікті әскери басқару органына жүгініп, толық ақпарат ала алады.

Шымкент қаласының Ақпараттық-коммуникациялық орталығы

Фото – Ернар Мамыр

Президент өз ұлын вице-премьер етіп тағайындады
«Осыдан бірер күн бұрын масқара жағдай болды» - Тоқаев
Сәйкес тақырыптар
Көтерілу