Цифрландыру мен жасанды интеллектіні дамыту аясында Шымкент қаласында технологиялық стартаптарды мемлекеттік сектордың нақты міндеттерін шешуге тартуға бағытталған G-TON бағдарламасы жүзеге асырылады. Жоба еліміздің бес өңірін қамтиды. Бастама технологиялық шешім әзірлеушілерге өз өнімдерін тәжірибеде сынап, өңірлік әкімдіктермен коммерциялық әріптестік орнатуға мүмкіндік береді.

Бағдарламаның негізгі мақсаты – стартаптардың әлеуетін қалалардың қажеттіліктерімен ұштастыру. Қазір цифрлық технологиялар мен жасанды интеллект құралдары қалалық инфрақұрылым, коммуналдық қызмет, көлік, тұрғындармен байланыс және мемлекеттік қызмет көрсету сияқты салаларда қолданылып келеді. Осындай бағыттардағы нақты мәселелерді шешуге арналған жаңа жобалар мемлекеттік басқару жұмысын оңтайландыруға көмектесе алады.

G-TON бағдарламасына қатысатын стартаптар өздерінің технологиялық шешімдерін Шымкенттің немесе өзге өңірдің нақты міндеттеріне бейімдейді. Одан кейін әкімдікпен бірлесіп пилоттық жобаны іске асыру жоспарын әзірлеп, оны тәжірибе жүзінде сынайды. Егер жоба күткен нәтижені көрсетсе, тараптар коммерциялық ынтымақтастықты жалғастыру мәселесін қарастыра алады.

Бағдарлама аясында қатысушылар үшін Астана қаласында офлайн хакатон өткізу көзделген. Сонымен бірге тәжірибелі трекердің қолдауы ұсынылып, пилоттық жобаны жүзеге асыру жоспарын әзірлеуге және әкімдік өкілдерімен тікелей байланыс орнатуға жағдай жасалады. Бұл стартаптарға өз өнімін жетілдіріп қана қоймай, мемлекеттік сектордың талаптары мен қажеттіліктерін тереңірек түсінуге көмектеседі.

Жасанды интеллект негізіндегі сервистер мен цифрлық платформалар қалалық мәселелерді шешуде жаңа тәсілдерді ұсына алады. Мәселен, деректерді талдау арқылы қызмет көрсету үдерістерін жетілдіру, өтініштерді өңдеуді жеделдету немесе қалалық ресурстарды тиімді басқаруға арналған құралдар әзірлеуге болады. 

G-TON бағдарламасы технологиялық кәсіпкерлер мен мемлекеттік органдар арасындағы байланысты нығайтуға бағытталған. Стартаптар үшін бұл – өз әзірлемелерін нақты ортада сынау мүмкіндігі болса, әкімдіктер үшін қаланың өзекті мәселелеріне жаңа технологиялық шешімдерді тартудың бір жолы.