Сайрам ауданы аграрлы бағыттағы экономикасы қуатты өңірлердің қатарында. Соңғы жылдары мұнда дәстүрлі ауыл шаруашылығы салаларымен қатар, балық шаруашылығы да дамып келеді. 

Бұл бағыттағы жүйелі жұмыстардың нәтижесінде ауданның ішкі нарықты отандық өніммен қамту әлеуеті артып, жаңа жұмыс орындары ашылып, ауыл тұрғындарының табысы еселеп өсуде.

Аудан экономикасында ерекше серпін берген жобалардың бірі — Сарыарық елді мекенінде орналасқан «Көмеш балық» жауапкершілігі шектеулі серіктестігі. Аталмыш кәсіпорын 259 гектар аумақта шабақ өсіру және тауарлы балық өндіру ісін жолға қойған. Мұнда 26 тоған бар, оның 13-і табиғи, қалғаны жасанды түрде салынған. Серіктестік 2016 жылдан бері шабақ өсірумен айналысып келеді. Бүгінде ақ амур, карп, сазан және дөңмаңдай секілді балық түрлері өсіріліп, дайын өнімдер ішкі нарыққа жөнелтілуде.

Жылына 721,6 тонна өнім өндіруде, бұл көрсеткіш Сайрам ауданының ішкі қажеттілігін қамтып қана қоймай, Түркістан облысының басқа аудандарын да сапалы балық өнімімен қамтамасыз етуге мүмкіндік береді. Жобаның жалпы құны — 750 млн теңге, қазіргі таңда 19 адам тұрақты жұмыспен қамтылған.

Балық шаруашылығының қарқынды дамуы аудан экономикасында бірнеше бағытта оң әсерін тигізуде: азық-түлік қауіпсіздігі қамтамасыз етілуде. Импортқа тәуелділікті төмендету мақсатында отандық өндірісті арттыру – елдің экономикалық тәуелсіздігін нығайтудың негізгі жолдарының бірі. Осы тұрғыдан алғанда, Сайрам ауданында өндірілетін балық өнімі тұрғындарды табиғи, сапалы әрі жергілікті өніммен қамтамасыз етіп отыр.

Ауыл шаруашылығының әртараптануы жүзеге асуда. Балық шаруашылығы – егіншілік пен мал шаруашылығына қосымша, балама табыс көзі ретінде дамып келеді. Бұл ауылдық жерлерде тұрақты экономикалық белсенділікті сақтау үшін маңызды.

Жаңа жұмыс орындары ашылуда. Балық өсіру жобалары жастар мен жұмыссыз тұрғындарды еңбекке тартуға жол ашты. Сонымен қатар, бұл сала агрономия, гидробиология, ветеринария сынды мамандық иелеріне де сұранысты арттырып отыр.

Технологиялық жаңғыру орын алуда. Сайрамдағы балық шаруашылықтары заманауи әдістермен жұмыс істейді. Судың сапасын, балықтардың жем қорын оңтайландыру, экологиялық тепе-теңдікті сақтау сынды бағыттарда жаңашыл тәсілдер енгізілуде.

Қазіргі таңда Сайрам ауданында 20 агроқұрылым балық шаруашылығымен айналысуда. 2024 жылдың өзінде ауданда 1271,6 тонна тауарлы балық өндірілген. Бұл — аудандағы экономикалық белсенділіктің артқанын білдіреді. Сонымен қатар, бұл сандық көрсеткіш ауданның облыс бойынша көшбасшылар қатарына қосылуына негіз болып отыр.

Кәсіпкерлер тарапынан балық жемін отандық өндіріс есебінен өндіру, несие алу шарттарын оңтайландыру, тоғандық балық шаруашылығын дамытудың кешенді бағдарламасын қабылдау сынды нақты ұсыныстар көтерілуде. Бұл ұсыныстарды іске асыру – ауыл шаруашылығының жаңа деңгейге шығуына жол ашары сөзсіз.

Сайрам ауданында баламалы агробизнес бағыттарын дамытуға деген ынта бар. Мұндай ірі жобалар мемлекеттік бағдарламалардың тиімді жүзеге асырылып жатқанының көрінісі. Ауыл шаруашылығы мен агроиндустрия салаларын кешенді дамыта отырып, Сайрам ауданы өңірлік экономиканың тірек нүктесіне айналуда.

С.АБЫЛБЕКОВА