Былтыр халыққа арнаған Жолдауында президент Қасым-Жомарт Тоқаев егісчтікті суоандыру жүйесіне заманауи технологиялар мен инновацияны енгізуді тапсырғаны белгілі. Осы тапсырмаларды орындау мақсатында Түркістан облысына келген  Экология, геология және табиғи ресурстар министрі Мағзұм Мырзағалиев Шардара су қоймасынан машиналық әдіспен су көтеру станциясының вегетацияға дайындық жұмысын  көрді.

«Вегетациялық кезең жақындап келе жатыр. Диқандарды сумен қамтамасыз ету – біздің негізгі және стратегиялық міндетіміз. Маусымның сәтті өтуі осы жұмысқа тікелей байланысты. Облыста 300 мың гектар суармалы жер бар. Жұмыс тәулік бойы жүргізіліп, су үнемдеу технологиясын қолдану қажет. Ауыл шаруашылығы өндірушілерінің өздері де суармалы суды тиімді, ұқыпты пайдалануға қатысты шараларды қабылдауы керек», - деді Мағзұм Мырзағалиев.

Сапар барысында трансшекаралық Үлкен келес магистралды каналының (БКМК), «Зах», «Ханым» магистралдары каналдарының да жұмысы талқыланды.

«Өздеріңізге белгілі, Қазақстан жыл сайын көрші елдермен трансшекаралық су ресурстарын пайдалану бойынша келіссөздер жүргізеді. Уақытылы қабылданған шаралар өте маңызды. Алайда сумен қамтамасыз етуде су инфрақұрылымы мен су шаруашылығы нысандарының ахуалы да үлкен рөл атқарады. Сондықтан жөндеу жұмыстары сапалы, уақытылы жүруі керек», - деді министр.

Бұдан бөлек, Жетісай ауданындағы 1957 жылы салынған К-19 каналына автоматтындыру жүйесінің енгізілуін де атап өту керек. Себебі онда бүгінге дейін су қарапайым жолмен есептеліп келді, сондықтан су шығынын дұрыс бақылау қиынға соғып, ресурсты тиімді пайдаланылмау жағдайлары орын алды. Суды есептеудің автоматтты жүйесі енгізілгеннен кейін бұл тиімсіздіктер түгел жойылады. Әрі қарай осы жолмен Түркістан облысындағы басқа да каналдар жұмысы автоматтандырылады.