Атом энергетикасының салынуы – елдің үдемелі дамуы мен оның технологиялық әртараптануы бағытындағы маңызды қадамның бірі. Өйткені, уранның қоры бойынша әлемде екінші орында екенімізді ескерсек, АЭС салу ісіне жүрексінбей кірісуге болады. 

Онда атом өнеркәсібі мен медицина саласында ғылыми зерттеу, ауыл шаруашылығы, экономиканың барлық бағытында дамуға зор мүмкіндіктер туады. Бұдан бөлек, заманауи технологиялардың деңгейі атом электр стансасын салуға жетеді. Атом энергетикасы жөніндегі халықаралық агенттіктің (МАГАТЭ) талаптарына сай қауіпсіздік ережелерін сақтап, керекті міндеттелген стандарттарын қолданып, шыққан қалдықтарды залалсыздандырып, тиісті шараларын орындап отырса, ешқандай қорқыныш болмауға тиіс. Кеше Төлебей ауданының тұрғындармен кездескен Халықтық штаб мүшелері осылай деді.

Аудан орталығында өткен кездесуде аудандық мәслихат төрағасы Нұрлан Қойбағаров жұртшылық назарына АЭС құрылысының мәселесі жалпыұлттық референдум арқылы шешілетіні, осы себепті, 6 қазан күні белсенділік танытудың маңыздылығы айтты. 

- Атом энергетикасы жөніндегі халықаралық агенттіктің бас директоры Рафаэль Гросси әлем бойынша 17 мемлекет АЭС салуға ниет білдіргенін, оның ішінде нақты қолға алып жатқан 10 мемлекет бар екенін атап өтті. Ал, осы ондықтың ішінде Қазақстан да бар. Агенттік бұл жұмыстарды өз бақылауына алғалы отыр. Қазіргі таңда Қазақстанда кауіпсіздіктің жоғары деңгейіне сәйкес келетін жана буын атом электр станциясын салу мүмкіндігі талқылануда. Егер елімізде АЭС салынатын болса нысанды салу мен пайдаланудың процесі бүкіл өркениетті әлемде қолданылатын халықаралық қауымдастық әзірлеген ережелер мен нормаларға сәйкес жүзеге асырылады, - деді ол. 

Сондай-ақ, жиын барысында Қазақстанның энергетикалық секторын трансформациялауға арналған бастамалар да сөз болды. Халықтык штаб мүшелері еліміздегі электр энергиясының қорымен байланысты туындап жатқан түйткілдерге тоқталып, атом энергетикасының тиімділігі туралы ғалымдар мен сала мамандарының пікірлерімен бөлісті.

Бұдан кейін, аудандағы бірқатар жауапкершілігі шектеулі серіктестіктерінің қызметкерлерінің қатысуымен өткен кездесуде атом электр стансаларының құрылысы инвестициялық жобаларды сәтті жүзеге асыруға жол ашатыны айтылды. Сондай-ақ, спикерлер басқосуда референдумның маңыздылығын түсіндіріп, көпшіліктің көкейіндегі сауалдарына жауап берді. Халықтық штаб мүшелерінің пікірінше, қазірдің өзінде еліміздің өнеркәсіп саласында қуат көзінің тапшылығы анық байқалуда. Ал, АЭС құрылысы энергетикалық тәуелсіздікті қамтамасыз етіп қана қоймай, экономиканың дамуына серпін бермек.

Ал, «Ленгір машина жасау» зауытының қызметкерлерімен кездесуде 6 қазан күні өтетін жалпыхалықтық референдумның маңыздылығы мен энергия тапшылығы кеңінен айтылды. Бұл күні Халықтық штаб мүшелері атом электр стансасын салу жөнінде өз ой пікірлерін ортаға салды. Олар өз сөздерінде АЭС салу үйдегі жылу мен экологиядан бастап, бизнесті дамытуға және жаңа кәсіпорындардың пайда болуына дейінгі мультипликативті әсер беретін ауқымды жоба екенін атап өтті. Осы себепті, олар енбек адамдарын ел игілігі үшін маңызды шешім қабылдауға және АЭС құрылысын колдауға шақырды.

- Атом энергетикасы ел экономикасының тұрақты дамуына негіз болатын бірегей сала. Оның үстіне, атом электр станциялары импорттық энергия ресурстарына тәуелділікті азайтуға және елді тұрақты энергиямен қамтамасыз етуге мүмкіндік береді. Егер АЭС бой көтеріп, ел игілігіне берілсе, көмір жағу арқылы өндірілетін энергияның үлесі қазіргі 61-ден 40 пайызға дейін төмендейді. Осылайша, атом электр станцияларының құрылысы 2060 жылға қарай көміртегі бейтараптығына қол жеткізуде қабылданған стратегиясын орындаудың негізгі қадамы болмақ, - деді штаб мүшесі Бердіғали Өмірәлі.

Айта кетейік, осы күні «Есіктен есікке» акциясы аясында Халықтық штаб мүшелері аудан тұрғындарына тиісті түсіндірме жұмыстарын жүргізіп, сұрақтарына жауап берді.