Шымкент қаласы әкімінің орынбасары Сәрсен Құранбек осы аптада өткен дәстүрлі брифингте Шымкентте тұрғын үй басқармасы басшысының ұсталғанын растады. Бұған дейін Нұрбол Жүнісбековтың қызмет бабын асыра пайдаланды деген айыппен Астана қаласында ұсталғаны әлеуметтік желіде жазылған болатын.

--Тұрғын үй басқармасы басшысына қатысты әлеуметтік желіде біраз пікірлер жазылды. Біздің білуімізше, бұл азаматтың ісі Арман Әбдешевке қатысты қылмыстық іске ұқасас болуы мүмкін. 2023 жылдары атқарылған жұмыстарға қатысы бар деп ойлаймыз,--деген әкім орынбасары қылмыстық іске қатысты түсініктеме беруге құқығының жоқтығын ескертті.

Шымкент қалалық әкімдігіне қарасты сәулет және қала құрылысы басқармасының басшысы Арман Әбдешевтің бұған дейін «қаржы жымқырды» деген айып бойынша ұсталғаны белгілі. Сол кезде Сәрсен Құранбек бұл істің Әбдешевтің Жамбыл облысында атқарған қызметімен байланысты екендігін мәлімдеген болатын. Антикор Әбдешевтің ұсталғанын жария еткенімен, бас сәулетшіге қандай айып тағылғаны туралы ешқандай ақпарат таратқан жоқ.

 Нұрбол Жүнісбековтың ұсталғаны туралы да әзірге ешқандай ресми ақпарат жарияланбай отыр.

Н.Жүнісбеков 2023 жылдан бастап Шымкент қалалық сәулет, қала құрылысы және жер қатынастары басқармасының басшысы лауазымын атқарған. Сол кездері Арман Әбдешев оның орынбасары болған. Биыл жыл басында басқарма екіге бөлінді. А.Әбдешев сәулет және қала құрылысы басқармасының басшысы,  Н.Жүнісбеков жер қатынастары басқармасы басшысының міндетін атқарушы болып тағайындалды. Наурызда Жүнісбеков тұрғын үй басқармасының басшысы лауазымына бекітілген болатын.