Оңтүстік—білікті кадрлардың ұстаханасы десек, мұнымен көпшілік келісетін шығар деген ойдамыз. Осы өңірде туып өсіп, республикалық деңгейде, өзге өңірлерде басшылық лауазымдар атқарған, жалпы көпшілік іскерлік қабілетін, кісілік келбетін, тұлғалық қасиетін мойындаған кадрлар аз емес. Олардың қатарында Амалбек Тшановты,  Өмірзақ Шөкеевті, Ислам Әбішевті, Асқар Мырзахметовті  атауға болады. Солардың ізін басып келе жатқан кадрлардың бірі Ербол Садыр күні кеше Абай облысы әкімінің бірінші орынбасары болып тағайындалды.

Оны бұл қызметке Абай облысының әкімі Берік Уәлидің шақырғаны айтпаса да түсінікті. Өйткені Берік Уәли уақтысында Оңтүстік Қазақстан облысы әкімі аппараты басшысының орынбасары, ішкі саясат басқармасының басшысы лауазымдарын атқарған. Ербол Садырдың іскерлігіне, ұйымдастырушылық қабілетіне қанық азамат. Сондықтан ұлы ақынның атымен аталатын облыста жасалған тағайындауды Ербол Садырды жақсы білетін Оңтүстік жұртшылығы өте сәтті таңдау ретінде қабылдады. Мұны соңғы күндері әлеуметтік желідегі жазбалардан да байқауға болады. Оның үстіне бұл тағайындау Ербол Садырдың қызмет іздемейтінін, керісінше, қызмет Ербол Садырды іздейтінін білдірсе керек.

Ербол Әбілхайырұлы теріскей өңірінің түлегі. Еңбек жолын да тоқсаныншы жылдардың қиын-қыстау кезеңінде Созақ ауданында бастаған. Бас дәрігердің экономика жөніндегі орынбасарлығынан басталған баспалдақ, аудан әкімдігінің экономика бөлімінің бас маманы, экономика және шағын кәсіпкерлікті қолдау бөлімінің меңгерушісі қызметтерімен жалғасты. Ербол Садырдың қаржы, экономика салаларының білікті маманы ретінде қалыптасуы осылай басталды. Одан әрі облыстық Кәсіпкерлікті қолдау басқармасы басшысының орынбасары, Экономика және бюджетті жоспарлау басқармасының басшысы қызметтерін атқарған. Осы жылдары Ербол Садыр облыстың экономикасын, бюджет жоспарлау салаларын бес саусағындай білетін білікті басшыға айналды. 2013 жылы мықты кадрларды жазбай танитын Асқар Мырзахметов оны өзінің қаржы, экономика жөніндегі орынбасарлығына шақырды.

Жалпы Оңтүстікте басқарған әкімдердің ішінде жұртшылық бүгінде Асқар Мырзахметовтың іскерлігін жиі еске алады. Алты жылдан астам уақыттың ішінде облыстың экономикасы қарыштап дамыды, көркейді. Осы еселі еңбекте Ербол Әбілқайырұлының да ойып алар орны бар десек қателеспейміз.

Осы жылдары облыста әкімі ауысса да Ербол Садыр әкімнің орынбасарлығын сақтап отырды. 2018 жылы Түркістан облысы құрылды.  Е.Садыр облыс басшысының орынбасары ретінде  қасиетті қаланың облыс орталығы, түркі әлемінің рухани астанасы ретінде қалыптасуына өзіндік үлесін қосты, қолтаңбасын қалдырды.   2019 жылы Шымкент қаласы әкімнің орынбасары, одан әрі бірінші орынбасары қызметтеріне тағайындалды. Міне, енді Абай облысы әкімінің бірінші орынбасары лауазымына келді. Бұл халыққа қызмет етудің жаңа кезеңі, жаңа белесі болары сөзсіз.     Қашанда елдің сенімін ақтай білетін Ербол Садырдың жаңа жұмысына тек жеміс тілейміз!