Шымкент қаласы бойынша Сыбайлас жемқорлыққа қарсы іс-қимыл департаменті басшысының бұрынғы орынбасары Дәуренбек Қожабаев 11 жылға бас бостандығынан айырылды. Қалалық қылмыстық істер жөніндегі мамандандырылған сот оны  аса ірі көлемде пара алды деген айып бойынша кінәлі деп тапты. Ол мемлекеттік  қызметте істеу құқығынан өмір бойы айырылды. Істің мән-жайына қарағанда, Қожабаев  қылмыстық жауапқа тартылған мектеп директорынан 42 миллион теңге пара алған.

Қожабаевтың үстінен қылмыстық істің қозғалғаны 2023 жылы белгілі болған. Алайда күдікті тергеу амалдарынан бой тасалап кетіп, оған халықаралық іздеу жарияланды. Қожабаев былтыр желтоқсанда ұсталды.

Оның ағасы Мақсат Қожабаев уақтысында Шымкент қаласының прокуроры, Сыбайлас жемқорлыққа қарсы іс-қимыл агенттігі төрағасының орынбасары лауазымдарын атқарған.  2023 жылдың күзінде Шымкентте үлкен Қожабаев аса ірі көлемде алаяқтық жасады деген айыппен 5,5 жылға бас бостандығынан айырылған болатын.

Кіші Қожабаевқа шығарылған үкім әлі күшіне енген жоқ.