Алматыда алаяқтық жасады деген күдікпен "Елге көмек" қайырымдылық қорының басшысы Ілияс Сариев ұсталды, деп хабарлайды Oinet.kz тілшісі.

Заңгер Нұрсұлтан Орынбеков қор басшысының үстінен қылмыстық іс қозғалғанын мәлімдеді. 

"Ілияс Сариев алаяқтық жасады деген күдікпен ұсталған. Осындай ақпарат келіп түсті. Оған қатысты бірнеше азаматтан шағым түскен. Әзірге белгілісі – ол осы шағымдар негізінде ұсталған", – деп жазды Орынбеков әлеуметтік желідегі парақшасында.

Полиция департаментінің баспасөз қызметі ақпаратты растады. 

Әлеуметтік желідегі парақшасында Ілияс Сариев өзін "қазақтың Робин Гуды" деген лақап атпен концерттер мен тойларды ұйымдастырушы ретінде таныстырады. Instagram парақшасында белсендінің 600 мыңнан астам оқырманы бар.

Ал "Елге көмек" қорының парақшасына шамамен 400 мың адам жазылған. Қор балалар мен қарттар үшін көмек жинау туралы жазбалар жариялап отырған. Алайда қордың ресми тіркеуден өткен-өтпегені белгісіз.