Табиғи апаттардан зардап шеккен халыққа алғашқылардың бірі болып қол ұшын созып көзге түсіп жүрген қоғам белсендісі Олжас Мамыр Шымкент қаласы мәслихатының депутаты Нұрғазы Бұхарбаевпен соттасуға дайын екенін мәлімдеді. Бұл туралы ол өзінің Facebook парақшасында жазды деп хабарлайды Oinet.kz тілшісі. 

Нұрғазы Бұхарбаев және Олжас Мамыр

Олжас Мамыр парақшасында Нұрғазы Бұхарбаевтың талап хатын жариялады. Хатта мәслихат депутаты Олжас Мамырдан жалған ақпарат таратқанын мойындап, 5 күн ішінде әлеуметтік желіде жариялауды талап еткен. Нұрғазы Бұхарбаевтың мәліметінше, қоғам белсендісі жеке парақшасында оның ар-намысына тиетін пост жазыпты. Бұл халық қалаулысының іскерлік беделіне нұқсан келтіріпті. Бірақ Олжас Мамыр депутатпен келіспейтінін айтып, одан кешірім сұрамайтынын ескертті. 

"Халықтың қалаулысы болу оңай емес. Әрине ол өзін халықтың адамымын десе оқпен шоққа көнеді. Ал, депутаттық мандаты бола тұра әкімге бас ұратын болса, онда халықтың мұң—мұқтажы мен үдеріне жарай алмайтынын сезінген халық қалаулысы қызметін қоя салғаны дұрыс. Себебі ондай әкімдікте де жеткілікті деп есептеймін. 

Бүгін маған хабарласып, төменде тұрған фотоны жіберді. Көріп күлдім. Әрине барлығының өз құқығы бар. Бірақ сынды көтере білу, ол ер азаматтың бір белгісі.

Нұрғазы Бұхарбай сіз мен үшін ешкім емессіз, сізді депутат ретінде расында көргімде келмейді. Себебі сырттан менің көзқарасым бойынша, қолыңыздан түк келмейтін адамсыз. Сізден кешірім пост жазбаймын. Мен артық кеткен болсам, айыбымды өтеймін. Мен сізге  зоопарктегі хайуан емеспін, өз ақылыммен жазған сөзіме жауап бере аламын, - деп жазды қоғам белсендісі.

Сонымен қатар Олжас Мамыр Шымкентте дау болған Наурыз тойына қатысты пікір білдірген. Оның жазуынша, Нұрғазы Бұхарбаев Наурыз тойына 1 млрд 500 млн теңге бөлдіруге тырысқан. Бірақ бұл іс-әрекетінен ештеңе шықпаған. 

"Наурыз мерекесінде дау болған еді, қателеспесем  560 миллион теңгеге сіздің қатысыңыз бар екені сырт көзден бірден көрінгендей. Одан бөлек бұл ақша қысқарған. Негізі сіз 1 500 000 000 теңгеден көп ақша сұрауға қол қойғансыз. Бірақ әріптестеріңіз қырқып жіберген. Басқада депутаттар ақшаны қысқартпай, тура жіберсе онда таза масқара болатын едік. Бұл жерде сіздің көзіңізбен басқарма басшысының сұлулығына қарамай ақшаны қысқартқаны жөн болған екен деп отырмын.

Ерік өзіңізде. Қолыңыздан келгені коментарийлерімен алысу болса, онда қоя салғаныңыз дұрыс. Себебі қиын жағдайда елге жұмыс жасау керек. Сізге ешкім мін мен сын айтуға болмайды деген ойда болсаңыз, ақылым, жеке кәсіпкерлігіңізбен айналысыңыз. Елдің қызметінде боламын десеңіз, елдің міні мен сынына төзесіз,  төзіп қана қоймай,  оны жөндеумен айналысасыз. Мемлекеттік қызметтің нанын ақтап жеу керек деген нақыл сөзге берік болған дұрыс ау депутат мырза!" - деп жазды Олжас Мамыр. 

Осы оқиғаға байланысты әлеуметтік желіде көптеген блогерлер өз ойларын білдіріп, мәслихат депутатына қарсы шығуда.