Шымкент қаласының инвестициялық әлеуетін арттыру және индустриялық аймақтарды басқару тиімділігін жетілдіру бағытында маңызды халықаралық бастама көтерілді. 

«Shymkent Invest–Front Office» компаниясының бас директоры Д. Зиятбеков Түркияның озық тәжірибесін зерттеу мақсатында Қоджаэли қаласындағы әлемдік деңгейдегі «Gebze OSB» индустриялық аймағына арнайы сапармен барды. Бұл сапардың негізгі мақсаты  Түркияның ірі инвесторлардың қаражатымен ғана қаржыландырылатын, тиімділігі жоғары өндірістік платформа құру тәсілдерін талдау.

1991 жылы құрылған «Gebze OSB»  бүгінде Түркияның ең ірі әрі ең табысты индустриялық аймақтарының бірі. Оның жалпы аумағы 1300 гектарды қамтиды және мұнда түрлі өндіріс салаларында жұмыс істейтін 73 өндірістік компания орналасқан. Бұл аймақтың ең басты ерекшелігі және Шымкент үшін үлгі болатын тұсы жобаның Түркия және әлемдік тәжірибеде сирек кездесетін қаржыландыру моделі. Аймақ толықтай инвесторлардың жеке қаражаты есебінен, ешқандай мемлекеттік несие немесе бюджеттік қаржыландырусыз дамытылған. Бұл тәсіл OSB-нің қаржылық тәуелсіздігін, тұрақтылығын және басқарудағы икемділігін қамтамасыз етеді. Шымкент қаласының басшылығы осы тәжірибені жергілікті индустриялық аймақтардың басқару жүйесіне интеграциялау мүмкіндіктерін қарастыруда.

«Gebze OSB» аймағының инфрақұрылымы өндірістік тиімділік пен қауіпсіздіктің жоғары стандарттарына негізделген. Инфрақұрылымды жобалау кезінде өндірістік процестердің салалық ерекшеліктері және пайдаланушылардың нақты қажеттіліктері барынша ескерілген. Технологиялық шешімдердің ішінде ең озығы  жерасты резервтік электр желісінің тартылуы. Бұл жүйе апатты жағдайларда немесе жоспарлы жөндеу кезінде өндірістің тоқтап қалу қаупін толығымен жояды, бұл инвесторлар үшін өте маңызды. Сондай-ақ, өндірістік процестерді орталықтандырылған түрде қашықтан бақылауға және басқаруға мүмкіндік беретін заманауи SCADA жүйесі орнатылған. Бұл жүйе ресурстарды үнемдеуге, өндіріс тиімділігін бақылауға және қауіпсіздік шараларын жедел басқаруға мүмкіндік береді. Шымкенттегі «Жұлдыз» немесе «Тассай» сияқты индустриялық аймақтарға мұндай технологияларды енгізу өндіріс сапасы мен басқару мәдениетін жаңа деңгейге көтерері сөзсіз.

Сапар барысында Д. Зиятбеков «Gebze OSB» басшылығына Шымкент қаласының инвестициялық ахуалын, соңғы жылдардағы экономикалық өсімін, инфрақұрылымдық әлеуетін және қала индустриялық аймақтарының дайындығын жан-жақты таныстырды. Кездесудің негізгі нәтижесі  тараптардың Шымкент қаласының аумағында осы түрік үлгісіне негізделген бірлескен индустриялық аймақ құру бастамасын талқылауы. Мұндай жоба іске асса, ол қазақстандық және түрік инвесторларының капиталын біріктіру арқылы қаржылық тұрақтылығы жоғары, тиімді өндірістік платформаны қалыптастырады. Ынтымақтастық перспективалары бойынша пікір алмасу барысында, екі тарап та аймақтық экономикалық өсімге айтарлықтай үлес қосуға мүдделі екендіктерін білдірді. Түркиялық компаниялардың құрылыс, химия және жеңіл өнеркәсіп салаларындағы тәжірибесі Шымкент үшін өте құнды болмақ.

Кездесу нәтижесінде «Shymkent Invest–Front Office» басшылығы түрік инвесторларын Шымкент қаласына келіп, оның инвестициялық мүмкіндіктерімен, дайын индустриялық алаңдарымен және ұсынылып отырған жобалармен тікелей танысуға шақырды. Бұл сапар алдағы уақытта екі қала арасындағы экономикалық байланыстарды тереңдетіп, Шымкенттің Орталық Азиядағы ірі инвестициялық хаб ретіндегі рөлін нығайтуға үлкен серпін беретіні анық. OSB тәжірибесін импорттау  Шымкенттің индустриялық аймақтарын басқару жүйесін жаңа, халықаралық стандартқа көтерудің стратегиялық қадамы болып саналады.