Үшінші мегаполисте «Еңбек» мемлекеттік бағдарламасының шеңберінде жаппай кәсіпкерлікті дамыту ісі сәтті жүзеге асырылды. Бұл кәсіппен айналысамын деген жергілікті тұрғындар үшін үлкен мүмкіндік болған еді.

Кезінде аталмыш мемлекеттік қолдаудың арқасында бизнес идеясын жүзеге  асырып, жаңадан кәсіп ашқандардың бірі Жанна Беркімбаева.

- Бірнеше жыл бұрын «Атамекен» палатасы жанындағы «Бизнес бастау» курсына қатыстым. Қолыма сертификат алған соң, мемлекеттік грантқа құжат тапсырдым. Мемлекеттік қолдаудың арқасында өз ісімізді бастадық. Қазіргі таңда косметология кабинетінде бет тазарту, қасты түзету, бояу және т.б. бағыттар бойынша қызметтер көрсетемін - дейді кәсіпкер.

Шымкент қаласының тұрғыны  «косметология» бағыты бойынша комиссияға өз бизнес-жоспарын ұсынған. Нәтижесінде  жобасы мақұлданып,  200 АЕК көлемінде грантқа қол жеткізген.

Кәсіпкердің айтуынша, қазіргі қоғамда сыртқы келбетке, өзін-өзі күтуге деген қызығушылық күн санап артып келеді. Сондықтан да ол осы сұранысты тиімді пайдалану арқылы косметология кабинетін ашқан. Бұл сала тек пайда табуға ғана емес, адамдардың өзіне деген сенімін арттыруға да үлес қосады. Косметология кабинеті – кәсіби білім мен жауапкершілікті талап ететін орын. Білікті маман тері күтімі, бет тазалау, жасарту, массаж секілді қызметтерді сапалы көрсетсе, клиент саны да тұрақты түрде көбейеді. Ең бастысы – қызметтің қауіпсіздігі мен нәтижелілігі. Осы талаптар орындалғанда ғана тұтынушы сенімі қалыптасады. Бұл кәсіпте тазалық пен санитарлық талаптарды сақтау аса маңызды. Заманауи құрал-жабдықтар, сапалы косметикалық өнімдер және жайлы орта клиентке жақсы әсер қалдырады. Сонымен қатар қызмет көрсету мәдениеті де табысқа жетудің негізгі факторларының бірі болып саналады. Косметология саласында жарнаманың да рөлі зор. Әлеуметтік желілер арқылы өз қызметін таныстырып, акциялар мен жеңілдіктер ұсыну жаңа клиенттер тартуға көмектеседі. Ал тұрақты клиенттер – кез келген бизнестің берік тірегі. Косметология кабинетін ашу – дұрыс жоспарлау мен кәсіби шеберлікті талап ететін, бірақ үлкен пайда әкелетін кәсіп. Үздіксіз даму, жаңашылдыққа ұмтылу және клиентке деген құрмет арқылы бұл салада тұрақты табысқа және жоғары беделге қол жеткізуге болады.