Бүгінде кәсіп ашу жұмыссыздықпен күрестің басты құралына айналып отыр.  Өйткені барлығына мемлекеттік мекемеден жұмыс тауып беру мүмкін емес. Әрі кәсіп ашу жұмыссыздықты азайтумен қатар қаланың экономикасының дамуына да ықпал етеді.  Сол себепті кәсіп ашамын, бизнес бастаймын дейтін азаматтарға қолдау көп.  Мұндай шаралар жоғарыда аталған ұлттық жобада да қарастырылған. Кәсіпкерлікті дамыту бағыты бойынша биыл қалада 3050 адамға қолдау көрсетілмек. Оның 1 900 «Бастау Бизнес» жобасы бойынша кәсіпкерлік негіздерге оқыту көзделген. 

Шымкент қаласының тұрғыны Гүлжазира Рысқұлова мемлекет ұсынған мүмкіндікті тиімді пайдаланған кәсіпкерлердің бірі. Ол бұған дейін 21 күндік «Бизнес бастау» оқу курсын аяқтап, сертификат алған соң, «Жиһаз жасау ісі» бойынша комиссияға өз жобасын ұсынды. Нәтижесінде, жобасы мақұлданып 200 АЕК көлемінде мемлекеттік грантқа ие болған.

Бөлінген қаражатқа керекті құрал-жабдықтарын сатып алып, қазіргі таңда тапсырысқа түрлі үлгіде жиһаздар жасауда. Айтуынша сұраныс көп. Төрт баланың анасы бұл жетістігімен шектелмей, алдағы уақытта жиһаз шеберханасын дамытуды жоспарлап отыр. «Өзім төрт баланың анасымын. Мақсатым өнегелі ұрпақ тәрбиелеп, оларды еңбек пен кәсіпке баулығым келеді. Ол үшін әуелі біз-ата аналар үлгі көрсетуіміз керек. Сондықтан да мен қазіргі жетістігіммен шектелмей, алдағы уақытта шағын шеберханамды әрмен қарай дамытуды жоспарлап отырмыз», - дейді кейіпкеріміз.

Адам баласы үй тұрғызса да, кеңсе ашса да, мектеп, балабақша, дәмхана ашса да, бірінші кезекте жиһаз қажет. Осы қажеттілікті сапалы әрі ерекше үлгіде қамтамасыз еткен шеберге сұраныс арта түседі. Үйге арналған диван, төсек, асхана жиһаздары, кеңсеге арналған үстелдер мен орындықтар – мұның бәрі күнделікті сатылатын тауарлар. Жиһаз жасау – шеберлік пен кәсіпкерлікті ұштастыратын тамаша кәсіп. Қарапайым құралдармен, үлкен шығармашылықпен, адал еңбекпен бұл саладан үлкен пайда көруге болады. Әсіресе, отандық өнімді қолдау мен «өз ісіңді аш» деген мемлекеттік бағдарламалар аясында бұл кәсіпті дамыту – болашағы зор бағыт.

Шымкент қаласында соңғы жылдары жиһазға сұраныс ұлғайып келеді. Себебі қалада жаңадан салынып пайдалануға беріліп жатқан тұрғын үйлер көп. Үй иелері пәтерлеріне жиһаз алғысы келеді. Сондықтан да жиһаз жасаушыларға тапсырыстар өте көп түседі. Гүлжазира Рысқұлова да тапсырыстан кенде емес. Ол әрбір клиентінің көңілінен шығуға тырысып, жиһазды сапалы етіп жасайды. Ал сапалы өнімге сұраныс көбейе түсетіні белгілі. Сондықтан бұл үдерісті тиімді пайдаланып, сапалы әрі қолжетімді жиһаз өндіру – экономикалық дамудың бір маңызды бағыты.