Шымкент қаласында интернет инфрақұрылымын дамытуға бағытталған маңызды қадам жасалды. «Freedom Telecom» компаниясы кабель тартуды қажет етпейтін, жоғары жылдамдықтағы FWA (Fixed Wireless Access) қызметін іске қосты. 

Бұл технология бұрын техникалық немесе қаржылық тұрғыдан қолжетімсіз болып келген аудандарға жылдам және тұрақты интернетке қосылуға мүмкіндік береді.

Жаңа жүйені таныстыру үшін Орталық саябақтағы «Шахматшылар үйінде» арнайы брифинг өтті. Оған компания мамандары, қалалық Цифрландыру басқармасының өкілдері және БАҚ қызметкерлері қатысты.

«Шымкент – еліміздің ең жылдам дамып келе жатқан мегаполистерінің бірі. Біз мұнда жаңа байланыс технологиясын енгізгенімізге қуаныштымыз. FWA қызметі үйлерге, бизнес нысандарына, мектептер мен әлеуметтік мекемелерге жоғары жылдамдықтағы интернет ұсынады», – деді «Freedom Telecom» бас директоры Қайрат Ахметов.

Қалалық Цифрландыру басқармасының басшысы Мұхит Кемелов жаңа қызметтің шаһардың цифрлық дамуына үлесін қосатынын атап өтті. Ол технологияның жасанды интеллект, смарт-қала жобалары және басқа заманауи цифрлық шешімдерді енгізуге мүмкіндік беретінін айтты.

Брифинг барысында басқарма басшысы қаладағы интернет инфрақұрылымын жақсарту бойынша атқарылған жұмыстарға тоқталды. «Мобильді байланыс әлсіз қабылданатын 147 аумақтың барлығы анықталды. Арнайы жол картасын іске асыру нәтижесінде олардың саны 11-ге қысқарды», – деді Мұхит Әбутәліпұлы.

Биыл өңірде 23 елдімекенде интернет сапасын арттыру жоспарланған. Қазіргі таңда 15 елдімекенде қажетті жұмыстар аяқталып, тұрғындар жоғары жылдамдықтағы интернетке қосыла алды. Қалған сегіз елдімекенде жұмысты жыл соңына дейін аяқтау көзделген. Осылайша, қала аумағын кең жолақты интернетпен толық қамту жоспары іске асырылуда.

Жаңа технология тұрғындар үшін ғана емес, бизнес пен білім беру саласы үшін де маңызды. Жылдам және тұрақты интернет арқасында компаниялар өз қызметін дамыта алады, білім мекемелері онлайн ресурстар мен қашықтан оқыту мүмкіндіктерін толық пайдалана алады. Сонымен қатар, FWA желісі шеткі және қиын қолжетімді аудандарды қамтиды, бұл тұрғындардың ақпаратқа қолжетімділігін арттырады.

Шымкенттегі бұл бастама қаланы цифрлық инфрақұрылыммен қамтамасыз етіп қана қоймай, тұрғындардың өмір сапасын көтеруге және қала экономикасын жаңа деңгейге шығаруға септігін тигізеді.