Шымкент қаласында заңсыз құрылыс мәселелері мен экологиялық тәртіпті сақтау тұрақты бақылауға алынған. Қала әкімінің орынбасары Сәрсен  Құранбектің хабарлауынша, тұрғындардың қауіпсіздігі мен қала тәртібін сақтау басты назарда тұр.

Адырбеков көшесі, №70 ғимаратта бір қабатты монша, дүкен және салоны рұқсатсыз біріктіріліп, емдеу орталығына айналғаны анықталды. Қала құрылыс басқармасы құрылыс иесіне заң талаптарын түсіндіріп, жұмысты дереу тоқтатты. Сонымен қатар, заңсыздық үшін оған 800 мың теңгеден астам айыппұл салынды.

Қала әкімдігінің өкілі тұрғындарға құрылыс бастамас бұрын міндетті түрде рұқсат алу керектігін еске салды. Құрылыс нормаларын сақтау – тек заңдық талап қана емес, сонымен бірге қауіпсіздік пен тұрғындардың жайлылығының кепілі. Заң талаптарын орындау қаланың тәртібін сақтау мен қауіпсіз ортаны қамтамасыз етуге мүмкіндік береді.

Сонымен қатар, Шымкенттегі экологиялық бақылау жұмыстары да жалғасуда. Қаратау ауданы, 192-орам, 638 мекенжайында орналасқан «СТ-Бетон» ЖШС өндірістік нысаны қызмет атқаруда. Жер телімінің нысаналы мақсаты өндіріс қызметіне сәйкес болғанымен, тұрғындардан түскен шағымдар ескеріліп, аудан әкімдігі мен құзырлы мемлекеттік органдар кешенді тексеру жүргізді.

Тексеру нәтижесінде заңбұзушылықтар анықталмағанымен, тұрғындардың пікіріне мән берілді. Зауыт басшылығы өндіріс нысанын ағымдағы жылдың соңына дейін басқа аумаққа көшіруге әкімдікке кепілдік берді. Қазіргі уақытта көшіру жұмыстары басталып, тиісті шаралар жүзеге асырылуда. Бұл қадам ауданның экологиялық жағдайын жақсартуға және тұрғындардың тыныштығын қамтамасыз етуге бағытталған.

Сәрсен  Құранбек қала тұрғындарын құрылыс және өндірістік нысандардағы заңдылыққа ерекше назар аударуға шақырды. Оның айтуынша, тұрғындардың амандығы мен қала инфрақұрылымының қауіпсіздігі заң талаптарын сақтау арқылы ғана қамтамасыз етіледі. Заңсыз құрылыс пен экологиялық нормаларды бұзу тұрғындарға ғана емес, бүкіл қалаға қауіп төндіруі мүмкін.

Шымкенттегі бұл іс-шаралар  қала билігінің тұрғындардың құқықтары мен қауіпсіздігін қорғауға деген жүйелі ұмтылысының көрінісі. Заңға сәйкес жүргізілген құрылыс және экологиялық тәртіп  қаланы дамыту мен тұрғындардың өмір сапасын арттырудың маңызды шарты болып саналады.

Тұрғындар мен кәсіпкерлердің жауапкершілігі, заңды нормаларды сақтау және қала билігінің тұрақты бақылауы арқасында Шымкент  қауіпсіз, тәртіпті және жайлы қалаға айналып келеді.