Қазақ халқының салт-дәстүрі тек тарих қоймасы ғана емес, әр заманда өз өміршеңдігін сақтап, қоғам мен тәрбиенің айнасы болып келеді.

Дәстүр тек той-думанда немесе мерекелік рәсімде ғана көрінбейді, ол күнделікті тұрмыста, білім беру процесінде, жастармен қарым-қатынаста да өз маңызын көрсетеді.

Бұл туралы Шымкент қаласындағы Оңтүстік Қазақстан көп салалы колледжі директорының тәрбие ісі жөніндегі маманы Айгүл Арыбекқызы өз көзқарасын білдірді. «Салт-дәстүрді тек сыртқы рәсім ретінде көрмейміз. Ол  біздің ұрпаққа қалдыратын рухани қорымыз. Колледжде біз студенттерге тек кәсіби білім беріп қана қоймай, олардың мәдени санасын, рухани тәрбиесін де дамытуға тырысамыз. Қазақ дәстүрінің мәні – білім мен өмір мәдениетінде, күнделікті әдетте көрінуінде. Студенттерге өзара сыйластықты, үлкенді құрметтеуді, бір-біріне мейірімді болуды үйрету – бұл да дәстүрдің жаңа көрінісі», – дейді Айгүл Арыбекқызы.

Оның пікірінше, дәстүр тек өткеннің естелігі болмауы тиіс, ол қазіргі заманға бейімделіп, жаңа формада көрінуі керек. «Бүгінгі студент үшін дәстүр тек ата-бабамыздың әдеттері емес, ол өз өмірінде қолданатын құндылықтар жүйесі. Мысалы, бірлесіп жұмыс істеу мәдениеті, уақытты сыйлау, жауапкершілік сезімін қалыптастыру осының бәрі дәстүрлі тәрбиеге негізделеді. Білім беру – тек оқыту емес, ол мәдениет арқылы тәрбие беру», – дейді ол.

Айгүл Арыбекқызының айтуынша, колледжде дәстүрлі құндылықтарды жаңаша насихаттау тәсілі табылған. «Біз студенттердің шығармашылық жобаларын, ғылыми жұмыстарын ұлттық нақышпен байланыстырамыз. Әрбір жоба тек практикалық пайда емес, сонымен қатар мәдени мәнге ие болуы тиіс. Сол арқылы студенттер дәстүрді тек естелік ретінде қабылдамай, оны өмірдің әр күнінде қолдануды үйренеді. Бұл жаңа дәстүрлі тәжірибе», – деп бөлісті ол.

Рас, дәстүрді сақтау  тек ата-ана немесе мұғалімнің міндеті емес, әр адам өзінің ісімен үлгі көрсетуі керек. «Жаңа Қазақстанның жасампаз жастарын тәрбиелеу үшін салт-дәстүрімізді үйретуіміз керек. Егер әрбір студент, әрбір жас өз ісінде дәстүрлі құндылықтарды қолданса, ұлттық мәдениетіміз жаңаша өркендейді. Мысалы, бір-біріне сыйластық көрсету, жолдастыққа мән беру, үлкенді құрметтеу бұл бүгінгі заманның да, дәстүрдің де талабы», – дейді Айгүл Арыбекқызы.

Кейіпкеріміз дәстүрді жаңаша көрініспен ұрпаққа жеткізудің маңызды екенін атап өтті. «Дәстүр – тек өткеннің тарихы емес, қазіргі өмірдің айнасы. Егер біз оны күнделікті тұрмысымызға енгізіп, жастарға дұрыс үлгі көрсетсек, ұрпаққа тек білім емес, мәдениет пен адамгершілік аманатын қалдырамыз. Бұл дәстүрдің ең құнды миссиясы», – деп түйіндеді Айгүл Арыбекқызы.

Аида ӨТЕП