Шешендік өнер – қазақ халқының баға жетпес рухани қазынасы.

Бұл өнер түрі ұлттың сөзге деген құрметін, терең ойлау қабілетін, тапқырлығын, парасатын танытады. Сондықтан шешендік өнерді сақтау – ұлттың болмысын, мәдениетін сақтау деген сөз. Әл-Фараби атындағы ғылыми-әмбебап кітапханада  кітапханашыларға арналған арнайы шешендік өнер сабағы ұйымдастырылады. Мұны руханият ордасының басшысы А.Жаппарқұлова былайша түсіндірді: «Кітапхана – білім мен руханияттың алтын ордасы. Ал кітапханашы – сол орданың жүрегі. Оқырман мен кітап арасындағы көпір болып табылатын кітапханашының кәсіби мәдениеті, қарым-қатынас стилі, ынтасы мен ізденісі – оқырман тартуда аса маңызды рөл атқарады.

Сондықтан осындай бастама қолға алынды. Іс-шараның мақсаты кітапханашылардың сөйлеу мәдениетін арттыру, көпшілік алдында сөз сөйлеу дағдыларын жетілдіру және кәсіби қарым-қатынас деңгейін көтеру»

Сабақты тәжірибелі маман, шешендік өнер бойынша тренер Гүлнұр Советханқызы жүргізді. Қатысушылар шешендік өнердің негізгі қағидаларымен танысып, тыңдаушылар алдында сенімді сөйлеу, ойды анық әрі әсерлі жеткізу тәсілдерін үйренді. Кітапханашылар мұндай оқыту бағдарламаларының кәсіби дамуға зор үлес қосатынын атап өтті.

– Шешендік өнерді игеру – тұлғаның ойлау, сөйлеу және әсерлі жеткізу қабілетін дамытатын маңызды құрал. Жалпы шешендік өнер адамға қанмен де келеді. Кітапханашылар бұл өнерді меңгеру арқылы адам рухани тәрбие мен ұлттық құндылықты бойға сіңіреді, - дейді оқырмандарға қызмет көрсету бөлімінің басшысы А.Байдилдаева. 

Қазіргі Әл-Фараби атындағы кітапхана – бұл заманауи ақпараттық кешен, ол кітапхана қызметімен қатар, музей, мәдени-ағартушылық және ғылыми-зерттеу орталығы, сондай-ақ планетарий функцияларын да атқарады.

Бүгінде кітапхана қоры 400 мыңнан астам баспа және 6714 электронды кітапты қамтиды. Жыл сайынғы кітап беру көлемі — 1 081 847 дана, оқырмандар саны — 53 921, келушілер саны — 287 507 адам. Кітапханада 55 шығармашыл маман жұмыс істейді. Олар келушілерге ерекше көңіл-күй мен рухани байлық сыйлайтын орта қалыптастырып отыр.  Кітапхана ұлы ғалымның есімін лайықты түрде алып жүр. Кітапхананың мақтанышы — әл-Фараби залы, ол өзінің көрінісімен музейге ұқсайды. Мұнда келушілер ғалымның өмірі мен ғылыми қызметімен жақынырақ таныса алады. Арнайы жасалған үш тілдегі электронды анықтама арқылы әл-Фарабидің өмір жолының барлық кезеңдері егжей-тегжейлі баяндалған. «Жүз рет естігенше, бір рет көр» деген ұстанымды кітапхана ұжымы да, келушілер де қолдайды. Себебі заманауи технологиялар арқылы ұлы ойшылдың өміріндегі оқиғалар мен деректерді есте сақтау әлдеқайда жеңіл әрі әсерлі болады.