Кітап – білімнің, тәрбие мен рухани байлықтың көзі. Балаға кітап оқуды үйрету – оның ой-санасын ояту, қиялын ұштау, дүниетанымын кеңейту деген сөз. 

Кітап арқылы бала өз болашағын бағдарлап, армандарына сеніммен қадам басады. Әл-Фараби атындағы ғылыми-әмбебап кітапханада  «Жазғы демалыста кітап оқимыз!» жобасы аясында «Ақерке» балалар залының ұйымдастыруымен балалардың жазғы демалысын тиімді өткізу мақсатында балалармен қызықты кітаптарды талқылап, логикалық ойындар ойнатылды. 

– Бұл жоба аясында кітапхана жас оқырмандарға арнап түрлі жанрдағы қызықты кітаптар тізімін ұсынды. Балалар оқыған кітаптары туралы пікір алмасып, суреттер салып, шығармашылығын дамытты. Ата-ана мен ұстаздың басты міндеті – баланы ерте жастан кітапқа баулу, оған үлгі болу. Кітапты бірге оқу, оқығанын талқылау – бала мен ата-ана арасындағы байланысты нығайтады әрі баланың бойына сенімділік ұялатады. Сондықтан осындай жобаны қолға алдық. Жалпы кітап оқуды бала кезінен қалыптастыру - баланың өз ойын еркін жеткізе алуына;  сөздік қоры көбеюіне, өмірдің мәнін, адамгершілік құндылықтарды ерте түсінуіне жол ашады. Және де бос уақытын пайдалы өткізуге дағдыланады әрі  армандай біледі, мақсат қояды, - дейді кітапханашылар. 

«Жазғы демалыста кітап оқимыз!» жобасы тек ғимарат ішінде ғана емес, саябақтарда да қызықты етіп ұйымдастырылды. Бұл туралы қала тұрғындарының пікірі де ерек. 

– Бала кезімізде кітапхананың есігін тоздырып, сыныптастарымызбен кітап оқып жарыстық. Әл-Фараби атындағы кітапханадағы балалардың кітап оқуға дағдыландыруға байланысты ұйымдастырып жүрген іс-шаралары – үлкен еңбек. Ұлы Абайдың өзі айтқандай, «Артық білім — кітапта». Ендеше, кітап оқу — тек білім жинау емес, бұл — тұлға болып қалыптасудың, адам болып жетілудің жолы.  Мұны жоба ғана емес, руханият пен білімді ұштастыратын, ұлттық құндылықтар мен оқуға деген сүйіспеншілікті дәріптейтін маңызды алаң деп те атағым келіп тұр. Кітап — ұлттың рухани айнасы. Ал кітап оқитын бала — ойы ояу, санасы сергек, болашағына сеніммен қарайтын ұрпақ. Бүгін біз жастарды кітапқа, білімге, ізденіске баулу арқылы еліміздің ертеңіне жол ашамыз, - дейді төрт баланың анасы С.Тұрғантайқызы. 

«Жазғы демалыста кітап оқимыз!» кезекті жобасы Орталық саябақта өтті.Ашық аспан астындағы шағын кітап көрмелері мен жылжымалы кітап сөрелеріне жалпы саны 100-ге жуық балаларға арналған түрлі жанрдағы көркем әдебиеттер, ертегілер, энциклопедиялар, түрлі жаңылтпаштар мен жұмбақтар жинағы қойылды. Балалар үшін қызықты әдеби викториналар, ертегі сағаттары, мәнерлеп оқу сайыстары ұйымдастырылды. Жас оқырмандар интернетке тәуелділіктен бір сәтке арылып, таза ауада бойларын сергітіп алды.

Кітап оқитын ұлт – ұмтылысы биік, өрісі кең, ойы терең ұлт. Ұрпағына кітапты мұра еткен елдің болашағы әрқашан жарқын болмақ.